Марснинг Ердаги энг катта “бўлаги” аукционда 4 миллион долларга сотилади

Марснинг Ердаги энг катта “бўлаги” бўлган метеорит 16 июль куни Нью Йорк кимошди савдосида 4 миллион долларга сотилиши режалаштирилди. Бу ҳақда CNN хабар берди.

NWА 16788 номи билан танилган метеоритнинг оғирлиги 24,5 килограмм бўлиб, у ўзининг ранги билан ажралиб туради. Марс метеоритларининг аксарияти билан солиштирганда бу жуда катта. 

NWА 16788 2023 йил ноябрь ойида Нигернинг чекка Агадез минтақасидан топилган. Унинг ҳажми Ерда топилган Марснинг сўнгги метеорит бўлагига нисбатан қарийб 70 фоизга каттароқ. Бу ҳолат жуда кам учрайди. Ерда атиги 400 га яқин Марс метеоритлари аниқланган.

NWА 16788 фавқулодда аҳамиятга эга кашфиёт. У Ерда топилган энг катта Марс метеорити ва аукционга қўйилган энг қимматлисидир”, дейди Sothebyʼsʼнинг илмий ва табиий тарих бўйича вице-президенти Кассандра Ҳаттон.

Метеоритнинг ички таркибини таҳлил қилиш орқали унинг астероид зарбаси сабаб Марс юзасидан Ерга келиб қолгани маълум бўлган. Ер атмосферасига кираётганда ҳосил бўлган иссиқлик натижасида унинг баъзи қисмлари шишага айланган. Метеорит илм-фанга совға қилиниш ўрнига сотилаётгани кўпчиликда хавотир уйғотган.

“Агар топилма олигархнинг хазинасига тушса, бу шармандалик бўлади. У музейга тегишли. У ерда жисмни ўрганиш керак.  Болалар, оилалар ва кенг жамоатчилик ундан баҳраманд бўлиши лозим”, деди Шотландиянинг Эдинбург университети профессори Стив Брусатте.

Марснинг бошқа бир бўлаги 2021 йил февраль ойида Christieʼs аукцион уйида 200 минг долларга сотилганди.