Марснинг ўтмишда сув бўлган юзаси ҳозир қандай кўринишда? (видео)

Марсда миллиард йиллар аввал сув билан қопланган Жезеро кратери юзаси ҳозир қандай кўринишдалиги намойиш қилинди. Бу ҳақда Space хабар берди.

 

НАSA олимлари кратер юзасини суратга олган Perseverance марсоходининг бир неча юз тасвирлари асосида видео яратди. Натижада ранг-баранг ландшафтга эга бўлган кратернинг ҳозирги чўлга айланган юзасининг 360 даража кўриниши пайдо бўлди.

2023 йилнинг ноябрь ойида, уч кун ичида Perseverance марсоходи ўзининг Mastcam-Z камераси ёрдамида Жезеро кратери юзасини 993 та суратга олган, бу НАSAга видеони ясаш учун ҳисса қўшган. Қуйидаги расмга қарасангиз, ушбу расм ва видеода кўрсатилган ранг ўртасида катта фарқ борлигини кўрасиз.

Тасвирда Марс юзасининг табиий ранглари кўрсатилган, видеода эса ранг Ерникига ўхшаш ёруғликка мослаштирилган. НАSA олимларининг фикрича, бу рангни созлаш астрономларга кундалик тажрибадан фойдаланиб Марс ландшафтини ўрганишда ёрдам беради.

Бу ландшафт улкан Жезеро кратери бўлиб, у ерда тахминан 3,5 миллиард йил давомида дарё суви оқиб ўтадиган кўл бўлган. Perseverance марсоходи кратер геологиясини ўрганишдан ташқари, ердан ташқари микробларнинг ҳаёт белгиларини ҳам қидирмоқда.

Марсоход ҳозирда Аirey тепалиги деб номланган ҳудудда жойлашган. Бу ердаги ландшафт Марс юзасида сув мавжудлигини кўрсатади. Олимлар фикрича, майда, текис, оч рангли тошлар секин ҳаракатланувчи дарё қирғоғида тўпланган. Каттароқ тошлар эса кучли тошқин натижасида у ерда бўлган.

Олимлар, шунингдек, марсоход жойлашган жойда қадимги лава оқимининг қолдиқларини ҳам топган. 2030 йилларнинг бошларида Ерга етиб келадиган Марсдан олинган намуналарни ўрганиш вулқон жинсининг айнан қачон пайдо бўлганини аниқлашга ёрдам беради. Шу тариқа, Жезеро кратерида сув қачон ва қанча вақт давомида оқиб ўтганини аниқлаш мумкин.

Дарҳақиқат, Perseverance марсоходи Жезеро кратери тубида тадқиқот олиб борганидан сўнг, эндиликда қадимги дарё делтасини ўрганишга киришди. Кейин олимлар марсоходни дарё бўйлаб, юқорига олиб чиқади. Ушбу жойдан тош намуналарини олиш режалаштирилган. У ўзида қадимги Марс ҳаётининг белгиларини сақлаб қолган бўлиши мумкин.