Ўзбекистонда 2026 йилгача Тошкент—Андижон ҳамда Тошкент—Самарқанд пулли автомобиль йўлларини қуриб битказиш маълум қилинган эди. Мазкур лойиҳалар Жаҳон банки ва Европа тикланиш ва тараққиёт банки кўмагида амалга оширилиши айтилган. Аммо ҳар икки йўл қурилиши ҳали бошлангани йўқ. Транспорт вазири ўринбосари Жасурбек Чориев “Дарё”га берган интервьюсида қурилишлар нега кечикканига изоҳ берди.
Жасурбек Чориевнинг айтишича, Тошкент—Самарқанд ва Тошкент—Андижон пулли йўллари лойиҳаларига тузатиш киритилган. Ҳисоб-китоблар жараёни узоқ чўзилгани сабаб қурилиш кечикмоқда.
“Биринчи Техник-иқтисодий асослашни (ТЕО) ишлаб чиққанимизда баъзи суммаларни белгилаган эдик. Кейин уни бир неча марта оптималлаштиришга тўғри келди. Чунки янги йўлларда кўприклари, туннел ва бошқа қисмлари бор. Биринчи қилинган ТЕОʼга нисбатан янги ишлаб чиқилганида катта ўзгаришлар бўлди. Яъни иккала йўлнинг техник-иқтисодий асосларини ишлаб чиқишга кўп вақт сарфланди. Жумладан, Тошкент—Андижон йўлида тоғли ҳудуд ҳисобланган Қамчиқ довони бор. У ердан қанчалик кам туннел қурсак, лойиҳа шунча арзонлашади. Нархга ўзимиздаги ёки чет элдан олиб келинадиган технологиялар, ускуналар қиймати ҳам таъсир қилади. Йўлларни қанча қисми тепалик ёки пастликдан ўтиши, қайси участкага биринчи, қай бирига иккинчи бўлиб ётқизилиши керак, деган саволларга жавоб беришга жиддий қаралди ва лойиҳа мукаммаллаштирилди. Шунинг учун ҳам бизда озгина чўзилиш бўлди. Ҳозир мана тендер эълон қилинган. Илк натижалар Тошкент—Самарқанд йўли бўйича эълон қилинади. Мазкур лойиҳа учун жорий йил 26 июнь куни биринчи таклифларни оламиз, уларни ўрганиб чиқиб, дастлабки босқичдан ўтилгач, ғолибларни эълон қилишни бошлаймиз”, деди вазир ўринбосари.
Жасурбек Чориев пулли йўллар лойиҳалари қиймати камайтирилганига ҳам урғу берди.
“Масалан, Тошкент—Самарқанд пулли автомобиль йўли лойиҳаси қиймати 2,6 млрд доллардан 2,2 млрд долларга пасайтирилди”, дея маълум қилди вазирлки расмийси.
Жасурбек Чориев фикрича, янги йўллар қурилиши қачон бошланиши номаълум. Бунинг учун баъзи масалалар ҳал этилиши керак.
“Қурилиш қачон бошланиши ҳозир тендерда қатнашаётганларга боғлиқ жараён. Улар қандай талаблар қўйиши ҳам муҳим. Салоҳиятли компания тендерда қатнашиб, бизга яна озгина муддат беринглар, улгурмаймиз, дейдиган вазиятлар ҳам бўлади. Бу шунақа техник процес”, дея таъкидлади вазир ўринбосари.
Аввалроқ транспорт вазири Илҳом Маҳкамов Тошкент—Андижон ва Тошкент—Самарқанд автомобиль йўллари қурилиши 2025 йилда бошланишини айтганди. Ҳисоб-китобларга қараганда, Тошкент—Андижон пулли йўли лойиҳасининг умумий қиймати 4,65 миллиард долларни ташкил этади.
Изоҳ (0)