Америкалик машҳур рэпер ва продюсер Снуп Догг (Snoop Dogg) буюк британиялик ошпаз ва телебошловчи Гордон Рамзи билан ҳамкорлик қилиш ниятида эканини айтди.
53 ёшли санъаткор яқинда Шотландиянинг “Селтик” футбол клубига бўлган қизиқишини билдирган ва келгусида клубга сармоя киритишни истаётганини айтган. Бу орзусининг давоми сифатида у стадион ёнида бургерлар сотиладиган фургон ташкил этмоқчи.
“Мен футбол стадионига бургер фургонини олиб бориб, мухлисларга стадиондаги таомлар ҳам сифатли ва мазали бўлиши мумкинлигини кўрсатмоқчиман. ъСелтикъ мухлислари буни қадрлашади. Буни ўз кўзим билан кўриш учун улар учун ўзим хизматда бўламан”, деди хонанда The Sunday Mail нашрига берган интервьюсида.
Снуп Догг учун бу пазандалик соҳасидаги биринчи қадам эмас. У 2018 йилда From Crook to Cook номли ошпазлик китобини чоп этган бўлиб, унда ўзининг севимли рецептлари, жумладан soul food, яъни афро-америкаликлар миллий таомларига оид маълумотлар жамланган. Китоб ўзбек тилида “Жиноятчиликдан ошпазликкача” деб таржима қилиниши мумкин.
Муаллифнинг сўзларига кўра, мукаммал бургер яратиш учун таомга меҳр бериш лозим. Шунингдек, сифатли пишлоқ, яхши гўшт ва ўзига хос зираворлар аралашмаси ҳам зарур.
Изоҳ (0)