Санкт Петербург ҳукумати муҳожирларга курер ва такси ҳайдовчиси бўлиб ишлашни тақиқламоқчи. Қарор лойиҳаси 28 май куни шаҳар ҳукумати сайтида эълон қилинди.
Қонун лойиҳасига асосан 1 июлдан бошлаб электр велосипедлар ва самокатларда курерлик қилишга тақиқ жорий этилиши мумкин. Патентлар бўйича ишлайдиган мигрантларга қуйидаги иқтисодий фаолият турлари бўйича ишлашни тақиқлаш таклиф этилмоқда:
- Енгил автомобилларни ҳайдовчилик учун ижарага бериш ва такси хизмати;
- Курерлик хизмати;
- Турли транспорт воситалари орқали етказиб бериш хизмати;
- Уйга озиқ-овқат етказиб бериш фаолияти;
- Бошқа курерлик ишлари.
Ҳужжатга кўра, 1 июлдан бошлаб товар етказиб бериш соҳасида фаолият юритувчи компания ва тадбиркорларга талаб қўйилади. Жумладан, етказиб бериш реестрини юритишдан тортиб, пиёда етказиб берувчи курерларни уларнинг жойлашувини аниқловчи қурилмалар билан таъминлашгача.
Шунингдек, турли транспорт воситаларида ишлайдиган курерларни ҳам шу турдаги қурилмалар билан жиҳозлаш таклиф этилмоқда, уларнинг максимал тезлиги соатига 15 километр билан чекланади.
Мажбурий талаблар қаторига “курернинг кийимида, транспорт воситасида ва сумкасида ҳар бир курер учун ягона идентификация рақамини жойлаштириш” ҳам киради.
Тақиқ 1 июлдан кучга кириши керак ва 2025 йил охиригача амал қилади. Қарор кучга кирган кундан бошлаб уч ой ичида янги талабни бажариш мажбурияти юкланади. Меҳнат ва бандлик қўмитаси 2026 йил учун шунга ўхшаш қоидаларни белгилаш бўйича ўз таклифини тақдим этиши керак.
Изоҳ (0)