Ўзбекистонда 2025 йил 1 июлдан ногиронлик пенсиялари ҳам алоҳида мурожаат талаб этмасдан, проактив шаклда тайинланади. Бу ҳақда 27 майда имзоланган президент қарорида белгиланди.
“Ногиронлик пенсиялари ва компенсацияларни тайинлашда проактив хизматларни жорий этиш тўғрисида”ги президент қарорига кўра, 2025 йил 1 июлдан фуқароларга давлат пенсиялари ва компенсацияларни тайинлашнинг соддалаштирилган тартиби жорий этилади.
Яъни фуқароларга I ёки II гуруҳ ногиронлиги белгиланганда пенсияларни алоҳида мурожаат талаб этмасдан проактив шаклда тайинлаш. Бунда фуқарога проактив шаклда тайинланган пенсияларни рад қилиш ҳуқуқи берилади.
Кўриш қобилияти бўйича I гуруҳ ногиронлиги бўлган шахсларга ҳамда ядро полигонлари ва бошқа радиация-ядро объектларида ҳарбий хизматни ўтаган шахсларга компенсацияларни электрон маълумотлар алмашинуви асосида проактив шаклда тайинланади.
Ногиронлик пенсияси тайинлангандан сўнг камида 1 йил иш стажига эга бўлганда фуқаронинг пенсия миқдори ҳар 2 йилда проактив шаклда қайта ҳисобланади.
2025 йил 1 октябрдан давлат пенсия таъминотига оид ҳамда АТ “Халқ банки” томонидан пенсияларни нақд пул шаклида тўлаш билан боғлиқ хизматлар фуқароларни биометрик идентификация қилиш (Face-ID) ҳамда уларнинг имзосини электрон шаклда олиш орқали амалга оширилади.
Ўзбекистонда ёшга доир пенсияни ҳам проактив усулда тайинлаш белгиланган. Бу борада “Фуқароларнинг давлат пенсия таъминоти тўғрисида”ги қонунга тегишли ўзгартириш киритилди. Фуқаронинг ёшга доир пенсияга бўлган ҳуқуқи белгиланган ахборот тизимларидан олинган маълумотларга асосан аниқланади.
Ўзбекистонда ногиронлик пенсияси миқдори
2025 йил март ҳолатига кўра, Ўзбекистонда ногиронлик пенсияси ва нафақаси олувчилар сони қуйидагича бўлган:
- I ва II гуруҳ ногиронлик нафақаси олувчилар: 315 057 нафар (I гуруҳ 38 574 нафар, II гуруҳ 276 483 нафар);
- 18 ёшгача болаликдан ногиронлик нафақаси олувчилар: 171 380 нафар;
- 18 ёшгача болаликдан ногиронлиги бўлган болани парваришлаш нафақаси олувчилар: 75 390 нафар.
Умумий ҳисобда, ногиронлик билан боғлиқ пенсия ва нафақа олувчилар сони 561 827 нафарни ташкил этган.
I гуруҳ ногиронлик нафақаси миқдори 1 027 000 сўмни, II гуруҳ ногиронлик нафақаси миқдори 920 000 сўмни ташкил этиб, уларга март ойи учун жами 303,5 млрд сўм пул маблағлари тўлаб берилган. 18 ёшгача болаликдан ногиронлик нафақаси миқдори 920 000 сўм бўлиб, март ойи учун 163,6 млрд сўм тўлаб берилган. 18 ёшгача болаликдан ногиронлиги бўлган болани парваришлаш нафақасини миқдори 745 000 сўм бўлиб, март ойида бу тоифадаги шахсларга 57,6 млрд сўм маблағлар тўлаб берилган.
2024 йил 1 сентябрдан бошлаб Ўзбекистонда ногиронлик пенсияларининг энг кам миқдори ойига 920 000 сўм этиб белгиланган.
Изоҳ (0)