“Клон” 25 ёшда: сериалдаги севишганлар Лукас ва Жади нега ҳаётда тил топиша олмаган?

Бразилия киноижодкорлари томонидан суратга олинган “Клон” сериали эфирга узатила бошлаганига 25 йил тўлди. Бутун дунёда бир неча тилларга таржима қилинган машҳур лойиҳа бош қаҳрамонларидан бири Жади образини Жованна Антонелли ижро этган. Қуйида актрисанинг ҳаёт ва ижод йўли ҳақида кўпчилик билмайдиган маълумотлар келтирилади.
 

Бразилиялик актриса Жованна Антонелли сериалда оилавий урф-одатларга қарши туришга ҳаракат қилган Жади исмли марокашлик қиз ролини ўйнаб, миллионлаб одамларнинг қалбини забт этди.

Биография

Жованна Антонелли — бразилиялик театр ва кино актрисаси, фотомодел, телебошловчи ҳамда продюсер. Бугунги кунда актриса дунёнинг турли мамлакатларида намойиш этилган телесериаллар туфайли танилган. Мухлислар актрисада аёллик ва гўзалликнинг кучли, иродали характер билан уйғунлашишини қадрлашади. Журналистлар таниқли санъаткорнинг интервью беришни истамаслигини, шахсий ҳаётини омманинг ҳаддан ташқари эътиборидан ҳимоя қилишга ҳаракат қилишини таъкидлайди.

Болалик ва ёшлик йиллари

Антонелли 1976 йил баҳорида Рио де Жанейрода туғилган. Телеюлдуз опера хонандаси Гилтон Прадо ва балерина Суэли Антонеллининг қизи. Оилада Жованнадан ташқари яна бир фарзанд, унинг акаси Леонард ҳам бор эди.

Мусиқа ва ижод атмосфераси Антонелли оиласи аъзоларига бегона эмасди. Шунинг учун Жованнанинг ижоди 11 ёшида бошлангани ажабланарли эмас. Шу ёшда бўлажак юлдуз ҳаваскор театр саҳнасига чиқди ва ўшандан бери уни тарк этмади. Актриса истеъдодининг кўп қиррали эканини таъкидлаш керак: у нафақат рол ўйнайди, балки яхши қўшиқ куйлайди ва рақсга тушади. Шунинг учун ҳам вақти-вақти билан ушбу ҳаваскор театрга ташриф буюрадиган продюсерлар кўплаб ёш актёрлар орасидан дарҳол Жованнани танлардилар.

Кинодаги карьерасининг бошланиши

16 ёшга тўлганда, Антонелли кўпчилик сингари кичик роллар билан кинога кириб кела бошлади. Ёш бразилиялик актриса суратга тушган биринчи фильм машҳур “Ўзингизга ҳавола” мелодрамаси бўлди. Фильмнинг намойиши Лотин Америкаси мамлакатларида муваффақиятли ўтди. Жованна биринчи сезиларли муваффақиятини “Тропиканка” сериали чиққандан кейин қўлга киритди.

Актрисанинг карьерасида 2000 йил бурилиш нуқтаси бўлди — ўшанда у “Оилавий ришталар” машҳур мелодрамасида нопок йўллар билан пул ишлашга мажбур бўлган ёлғиз она Капиту ролини ижро этди. Антонеллининг олдида мураккаб вазифа турарди — ҳаёт тарзи жамият томонидан қораланган қаҳрамон образини экранда шундай акс эттириш керакки, томошабинларда қаҳрамонга нисбатан ҳамдардлик ва меҳр уйғонсин.

Образга чуқурроқ кириб бориш учун Жованна ушбу касб вакиллари билан мулоқот қила бошлади, улардан бири ҳатто актрисанинг дўстига айланди. Интервьюда Антонелли бундай аёлларга нисбатан нафрат ҳис қилмаслигини тан олди — Бразилияда оддий халқнинг ҳаёти оғир, уй-жой ижарасини тўлаш учун маҳаллий аёллар шундай қурбонликлар қилишга мажбур бўлишарди.

“Клон”

Актрисанинг юлдузлик чўққиси деб 2001 йилни айтиш мумкин, ўша йили у “Клон” мелодрамасида Жади ролини ўйнади. Антонелли билан бирга лойиҳада унинг бир неча йиллик ҳамкасб дўстлари — Даниэла Эскобар (Жованна қаҳрамонининг синглисини “Тропиканка”да ўйнаган) ҳамда Вера Фишер (“Оилавий ришталар”да рол ўйнаган) ҳам иштирок этди.
Жованнанинг сериалдаги партнёрлари Далтон Виг ва Мурило Бенисио бўлишди.

Дастлаб Антонелли саҳнага чиққач, бир қатор қийинчиликларга дуч келди. Баъзи саҳналар учун 168 см бўйли актриса шарқона рақсларни, шу жумладан қилич ва илон билан рақсларни ўрганиши, араб тилида бир нечта ибораларни ўзлаштириши керак эди. Жованна учун энг катта синовлардан бири туя устида ўтирган саҳналар бўлди — жонивордан қўрқиб, актриса имкон қадар уни дублёр билан алмаштиришни сўрарди.

Сериалнинг суратга олиш ишлари шу жумладан Марокашда ўтказилди — бу мамлакат Антонеллига унутилмас таассуротларни қолдирди. Ишдан бўш вақтларида Жованна маҳаллий маданият билан танишди, маҳаллий аёлларнинг хулқ-атворини кузатди. Иссиқда актриса мураккаб гримда юриши керак эди — кейинчалик актриса бу унинг терисининг ҳолатига салбий таъсир қилганини тан олди.

Тез орада сарфланган кучлар ўз самарасини берди: сериал чиққандан сўнг дарҳол Бразилия, Америка ва Европанинг яна 30 мамлакатида жуда машҳур бўлди. Лойиҳанинг муваффақияти унинг кўп қиррали экани билан боғлиқ эди. Сериалда мураккаб ва долзарб муаммолар, мусулмон мамлакатида аёлга муносабат, клонлаш, хиёнат, гиёҳвандликка қарамлик каби мавзулар кўтарилди. 25 ёшли Жованна бундай шуҳратни умуман кутмаганди. Актриса Мурило Бенисио билан бирга фильмни тақдим этиш учун дунёнинг ярмини айланиб чиқди.

Келгуси фаолияти

“Клон” муваффақиятидан сўнг, актриса дастлабки йилларда режиссёрлардан кўплаб таклифларни қабул қила бошлади. Ҳар йили Антонелли 2-3 та янги фильмда рол ўйнади — улар орасида сериал ва тўлиқ метражли фильмлар ҳам бор эди. 2012 йилда Бразилия экранларида “Мени қутқар, муқаддас Жорж” мелодрамаси чиқди, унинг режиссёри “Клон”нинг яратувчиси Глориа Перес эди. Анъанага кўра, Перес долзарб ижтимоий муаммоларни драматик сюжетга уйғун равишда жойлаштирди — бу сафар ҳикоя марказида одам савдоси мавзуси эди. Фильмда Жованна бош ролни ўйнади.

Кейинги йилларда актриса экранлардан тушмади, бундан ташқари у машҳур “Кичкина хўжайин” мультфильмининг Бразилия версияси учун овоз беришда иштирок этди. Бироқ Антонеллининг иш лойиҳалари орасида “Клон” каби ёрқин сериал бошқа кузатилмади. 2018 йилда Жованна “Иккинчи қуёш” фильмида бош ролни ўйнади, кейин унинг ижодида танаффус бўлди, шундан сўнг бразилиялик аёл 2021 йилда экранларга қайтди.

Шахсий ҳаёт

Жованна Антонеллининг шахсий ҳаёти қизиқ воқеаларга бой. Актриса 4 марта турмушга чиққан, лекин бу никоҳнинг фақат иккитаси расмийлаштирилган. Жованна биринчи турмуш ўртоғи тадбиркор Рикардо Медин билан 4 йилдан кўпроқ вақт бирга яшаган сўнг 2001 йил охирида ажрашишди. Ажралишнинг сабаби Антонеллининг Мурило Бенисио билан романтик муносабатларига боғлиқ эди, аммо актёрларнинг ўзлари муносабатлар сериалдан кейин бошланганини таъкидлашган.

Мурило Бенисио билан ишқий муносабатлар

Шунга қарамай миш-мишлар охирида тасдиқланди. Жованна ва Мурило ўз муносабатларини машҳур телекўрсатувда эълон қилишди, бу эса “Клон” сериали мухлисларини жуда хурсанд қилди. 2005 йилда машҳур юлдузларнинг биринчи фарзанди Петро дунёга келди. Аммо бола туғилгандан сўнг, деярли дарҳол жуфтлик шон-шуҳрат синовига дош беролмай ажрашди. Гап шундаки, ажралишнинг сабаби Бенисионинг оғир табиатига боғлиқ эди. Актёрлар кўп жанжаллашиб қолишарди ва охири алоқаларни узишга қарор қилишди.

2007 йилда Жованна Антонелли яна турмушга чиқди. Машҳур аёлнинг эри америкалик тадбиркор Роберто Локасио эди. Уларнинг тўйи Тоскана шаҳридаги қадимий виллалардан бирида бўлиб ўтди. Аммо тўрт ой ўтгач, Жованна ва Роберто ажрашишди. Ажримнинг сабаби киноактрисанинг собиқ эри Мурило Бенисио эди. Эркак Жованнага ўғлини мамлакатдан олиб чиқишни тақиқлаб, Робертонинг режаларига путур етказган. Роберто Жованна билан АҚШга кўчиб кетмоқчи эди. 
 

Кейинчалик Антонелли режиссёр Леонардо Ногейра билан яшай бошлади. Улар 2009 йилда суратга олиш майдончасида учрашишди ва 2010 йил ноябрь ойида Антония ва София исмли эгизак қизларнинг ота-онаси бўлишди. Қизлар туғилганига қарамай, эр-хотин ҳали ҳам расмий никоҳни рўйхатдан ўтказмаган. Ҳозирда ижтимоий тармоқларда баъзида юлдузнинг эри ва болалари билан суратлари пайдо бўлади.

Актриса шахсий ҳаётини съёмка жараёнлари ва бизнес билан муваффақиятли бирлаштирган. Кино юлдузининг ўзи қарор қабул қилишда мувозанатни сақлаб, содир бўлаётган воқеаларга ортиқча иштиёқсиз муносабатда бўлишга имкон берадиган ҳаётий қоидалари борлигини таъкидлайди. “Муносабатлар — бу чинакам дўстлик каби. Улар ҳасад, ўзаро талаблар ва айбловлар, рақобатдан холи”, дейди Жованна.

Ҳозирги Жованна Антонелли

2022 йилда мухлислар Жованнани Элоиза Сампаё ролини ўйнаган “Кесишиш” сериалида кўришди. Сериал томошабинлар орасида машҳурликка эришди, аммо 2023 йилда янги мавсум чиқмади. Кино соҳасида ишлашдан ортган бўш вақтини Антонелли оиласи билан ўтказади, шунингдек бизнес билан шуғулланади. Жованна Gio бренди остида атир ва сумкалар чиқаради. Интервьюларда актриса ўз маҳсулотларининг тарғиботи ҳақида гапиради ва ўзи ҳам реклама роликларида суратга тушади.