3 май куни Амазонка ботқоқликларидан 5 киши 36 соатдан сўнг қутқариб олинди. Улар учган самолёт аллигаторлар тўла ботқоққа фавқулодда қўнишга мажбур бўлган. Бу ҳақда BBC хабар қилди.
Маълум қилинишича, омон қолганлар орасида уч нафар аёл, бир бола ва 29 ёшли учувчи бор. Уларнинг аҳволи қониқарли экани айтилмоқда. Боливия полицияси 2 май куни самолёт радарлардан ғойиб бўлгач, қидирув ишларини бошлаган.
Учувчига кўра, Бауресдан Тринидад шаҳрига учаётган самолёт двигателида носозлик кузатилган. Шу сабабли авиатехника тўсатдан пастлай бошлаган. Самолёт Итаномас дарёси яқинига фавқулодда қўнишга мажбур бўлган.
Аллигаторлар йўловчиларга 3 метр яқинлашганидан сўнг улар самолёт устига чиқиб олган. Учувчининг айтишича, самолётдан бензин сизиб чиқиши йиртқичларни одамларга яқинлаштирмаган. Бундан ташқари, йўловчилар уларни қўрқитиш учун телефон чироқларидан ҳам фойдаланган. Сувда анаконда ҳам бўлгани таъкидланмоқда.
Қутқарувчилар келгунича йўловчилар ўзлари билан олиб келган маҳаллий маниок унини еб жон сақлаган. Аммо аллигаторлар сабабли уларнинг на сув ичишга, на қимирлашга имкони бўлган. Маҳаллий балиқчилар самолётни пайқаб қолганидан сўнг йўловчиларни шифохонага етказиш учун дарҳол вертолёт чақирган.
Изоҳ (0)