Футбол оламида яна бир юлдуз порламоқда — бу 17 ёшли “Барселона” футболчиси Ламин Ямал. У ёш бўлишига қарамай, аллақачон “Барселона” сафида 100 та ўйин ўтказди ва ўз ўйини билан мухлисларни лол қолдирмоқда.
Машҳур файласуф Жил Делоз айтганидек: “Вақт бизни яшайди, биз эмас”. Кечагина биз Месси “Барселона”да илк голини ургани гувоҳи бўлган эдик. Энди эса Ямални кузатиб, ҳайратда қолмоқдамиз.
Сўнгги йилларда футбол оламида “кейинги авлод” (нехтген) деган тушунча пайдо бўлди — бу Месси ва Роналду каби афсоналардан меросни давом эттириши кутилаётган футболчиларга нисбатан кўп қўлланилади. Айни пайтда кўпчилик мутахассислар ва мухлислар юқорида номи келтирилган икки афсонага муносиб ворис сифатида Мбаппе ёки Ҳоланд эмас, айнан Ямални кўришмоқда. Агар уни жароҳатлар ва ортиқча босимлар четлаб ўца, бу ҳақиқатга айланиши мумкин.
Нега айнан Ямал? Бунга икки асосий сабаб бор:
1. Эстетика ва ўйин услуби. Унинг ҳаракати — бу футбол эмас, худди сеҳрга ўхшайди. Роналду ва Ҳоланд — кучли, Месси — ақлли, Мбаппе — тез бўлса, Ямал — гўзаллик ва ижодкорликни уйғунлаштирган футболчи. У кўп ҳолларда Неймарни эслатади, футболни тактика ва жисмоний кучдан кўра, санъат сифатида кўрсатмоқда. Ҳозирги кунда футбол асосан тактика устига қурилмоқда, шу боис спортнинг мазкур тури мухлислар учун бир оз зерикарлироқ туюлмоқда. Ямал эса шу чегарани бузиб ташлади ҳамда футбол нақадар гўзал ўйин эканлигини яна исботлади. Айнан шу учун “Барселона”га алоқаси йўқ мухлислар ҳам Ламинни олқишламоқда.
2. Статистик кўрсаткичлар. “Интер”га қарши баҳс унинг “Барселона”даги 100-учрашуви бўлди. Бу ўйинларда у 22 та гол ва 33 та ассистга муаллифлик қилган. Таққослаш учун: Ямал ёшида Роналду 19 та ўйинда 5 та гол ва 4 та ассист билан чекланган, Месси эса атиги 9 та учрашувда 1 гол урган, холос.
Бундан ташқари, Ямал Испания терма жамоаси билан Евро-2024 турнирида ҳам ғолибликка эришган футболчи сифатида тарихга кирди.
У Чемпионлар Лигаси ярим финалида гол урган энг ёш футболчи бўлди. Бундан ташқари, Ямал — мусобақанинг 1/8, 1/4 ва 1/2 финал босқичларида гол урган илк 20 ёшгача бўлган футболчи.
Терри Анри Ямал ҳақида шундай деди:
Кўплаб футболчилар 17 ёшида бундай ҳаракатларни амалга ошира олмайди. Бу — фантастика.
Рио Фердинанд эса шундай фикр билдирди:
Тоза истеъдод нуқтаи назаридан — Ямал космос. Бунга бошқача таъриф бера олмайман.
Изоҳ (0)