Ijtimoiy tarmoqlarda kiprik ektirish oqibatida ko‘zidan ayrilgan ayolning videosi tarqaldi. Unda aytilishicha, kiprik ektirish jarayonida ishlatilgan yelim nojo‘ya taʼsir ko‘rsatgan. Ko‘z atrofi shishib, qichishish va quruqlik kuzatilgan. Ayol shifokorga borib ko‘ringanida qorachiq qurib qolgani va ko‘zni qayta tiklab bo‘lmasligi aytilgan. Ayolning bir ko‘zi olib tashlanib, o‘rniga yasama ko‘z qo‘yilgan.
Sunʼiy kiprik ektirish va buning ko‘zga qanchalik taʼsir qilishi bo‘yicha oftalmolog
“Daryo”ga tushuntirish berdi.
Sunʼiy kiprikdan uch kasallik
Ayollarimiz har doim, har zamonda chiroyli bo‘lib yurishni xohlashadi. Bemorlarimiz orasida hatto operatsiyaga katta-katta kipriklarini qo‘yib kelish holatlari kuzatiladi. Bu jarrohlik amaliyotiga xalal beradi, albatta.
Baʼzida kiprik ekkanda uni yelim bilan qo‘yadi. Bunda ko‘zga reaksiya bergan holatlariga guvoh bo‘lyapmiz. Hatto ko‘z ichiga yelim kirib ketgan vaziyatlarda ko‘zni tozalaganmiz. Bundan tashqari, ko‘zda shamollash keltirib chiqargan, yiringlash uchrab turibdi.
Agar vaqtida davolansa, bu kasallikdan tez tuzalish mumkin. Lekin aksar bemorlarimiz ish ko‘pligidan yoki boshqa sababdan shifokorga kech murojaat qilishadi. Oqibatda ko‘z yoshlanib yurib, yomon asoratlarga olib keladi.
Kiprik atrofida yog‘ bezlari bo‘ladi. Unga sunʼiy kiprik ekish davrida sog‘lom odamga infeksiya yuqishi mumkin. Bu bezlar tez shamollaydi va ko‘z shishib ketib, og‘riqlarga sabab bo‘ladi.
Ko‘zni oynasiga qovoqlar tegib turadi va oqibatda keratit kasalligini keltirib chiqaradi. Ko‘zning ichki tomonidagi shilliq qavatida esa konyuktivit kasalligiga olib keladi. Demak birdagina ko‘zda va uning atrofida 3 ta kasallik rivojlanadi: keratit yaʼni shox parda kasalligi, konyuktivit — shilliq parda kasalligi hamda terida dermatit. Bu uch kasallik sekin astalik bilan “ko‘z oynasini yeydi”. Oyna xiralashib-xiralashib, keyinchalik ko‘zni ichiga infeksiya o‘tishiga olib keladi. Ko‘zni ichiga o‘tganidan keyin uni davolash o‘ta qiyin kechadi. Oqibatda endoftalmit, panoftalmit kabi og‘ir kasalliklarga olib keladi va ko‘zni olib tashlashgacha borishi mumkin.
Yana bir xavf
Kiprik ekishda kuzatiladigan shamollash kasalligidan tashqari, ko‘zda quruqlik sindromi ham kelib chiqish xavfi mavjud. Qovoqlardagi bezlar ko‘zni namlab turadi. Agar biz kiprik qo‘yib, buni ozuqalanishini buzsak ko‘zda namlanish xususiyati yo‘qoladi. Sekin-astalik bilan ko‘zning shox pardasi quruqlashib qoladi. Bu ko‘zga doimiy ravishda namlantiradigan dori tomizib yurishga olib keladi.
Shifokor ko‘rigidan o‘ting!
Ko‘zga kiprik ekkanidan keyin ko‘z shifokori ko‘rigidan o‘tib qo‘yishni tavsiya qilardim. Chunki o‘tkazilgan amaliyot ko‘zga qanchalik taʼsir qilganini tekshirtirish foydadan holi bo‘lmaydi. Misol uchun, avval boshida kiprik atrofi qizarib turadi, lekin bunga ko‘pchilik ayollar ahamiyat bermaydi. Vaqtida qilingan muolaja kelajakda ko‘zingizdagi kuzatilishi mumkin bo‘lgan og‘ir asoratlardan asraydi.
Yuqoridagilardan kelib chiqib ko‘zga kiprik qo‘ydirishda ikkita kasallik: shamollash va ko‘zda quruqlik sindromi xavfini unutmaslik kerak.
Izoh (0)