Аргентиналик футбол афсонаси Диэго Марадонанинг ўлими бўйича суд жараёнида прокурор Патрисио Ferrari судьялар олдида шов-шувли далилни тақдим этди. У 2020 йил 25 ноябрь куни, Марадона ҳаётдан кўз юмган куни олинган суратни кўрсатиб, футболчининг оғир аҳволда бўлганини таъкидлади.
Мана, Марадона шундай вафот этди. Кимки сизга унинг ҳолати жиддий эмас эди, деса, сизга ёлғон гапиряпти. Ҳар ким ўз яқинлари ҳақида ўйлаб кўрсин: агар сиз уларни бир неча кун давомида шундай ҳолда ётганини кўрсангиз ва кимдир бу қотиллик эмас деб айтса, қандай аҳволга тушасиз?, дея Судьяга мурожаат қилди Ferrari.
Прокурор тақдим этган далилга кўра, футболчи 2020 йилнинг 11-25 ноябрь кунлари орасида ақлий қобилиятини тўлиқ ишлата олмаган ва ўз саломатлиги бўйича қарор қабул қилишга қодир бўлмаган.
Ўша давр мобайнида Марадонанинг ҳаётига зомин бўлган жараён устидан ҳеч қандай назорат ўрнатилмаган, уйда зарурий тиббий жиҳозлар бўлмаган ва уларни жойлаштиришга ҳам рухсат берилмаган. Унинг ҳаётини сақлаб қолиш учун ҳеч нарса қилинмаган. Бу – Марадона вафот этган уйда кечган ҳақиқий даҳшат саҳнаси эди, деди прокурор.
Прокурор афсонавий футболчининг ўлимида бепарволик ва тиббий хатоликлар муҳим рол ўйнаганини айтиб, асосий айбни шифокорларга юклади. Нейрохирург Леополдо Луки ва психиатр Агустина Косачов “қасддан қилинган қотиллик” моддаси бўйича гумонланмоқда. Агар суд уларни айбдор деб топса, 8 йилдан 25 йилгача қамоқ жазоси берилиши мумкин.
Шунингдек, Марадонага тиббий ёрдам кўрсатган бир неча мутахассис, жумладан, ҳамширалар, клиник шифокор ва психолог ҳам суд олдида жавоб беради.
Суд жараёни катта шов-шувларга сабаб бўлиб, нафақат маҳаллий, балки халқаро ОАВ вакиллари ва Марадонанинг мухлислари ҳам кузатиб бормоқда. Дастлабки режаларга кўра, суд уч ой давом этиши ва 120 киши гувоҳ сифатида кўрсатма бериши керак эканлиги айтилмоқда.
Изоҳ (0)