Argentinalik futbol afsonasi Diego Maradonaning o‘limi bo‘yicha sud jarayonida prokuror Patrisio Ferrari sudyalar oldida shov-shuvli dalilni taqdim etdi. U 2020-yil 25-noyabr kuni, Maradona hayotdan ko‘z yumgan kuni olingan suratni ko‘rsatib, futbolchining og‘ir ahvolda bo‘lganini ta’kidladi.
Mana, Maradona shunday vafot etdi. Kimki sizga uning holati jiddiy emas edi, desa, sizga yolg‘on gapiryapti. Har kim o‘z yaqinlari haqida o‘ylab ko‘rsin: agar siz ularni bir necha kun davomida shunday holda yotganini ko‘rsangiz va kimdir bu qotillik emas deb aytsa, qanday ahvolga tushasiz?, deya Sudyaga murojaat qildi Ferrari.
Prokuror taqdim etgan dalilga ko‘ra, futbolchi 2020-yilning 11-25-noyabr kunlari orasida aqliy qobiliyatini to‘liq ishlata olmagan va o‘z salomatligi bo‘yicha qaror qabul qilishga qodir bo‘lmagan.
O‘sha davr mobaynida Maradonaning hayotiga zomin bo‘lgan jarayon ustidan hech qanday nazorat o‘rnatilmagan, uyda zaruriy tibbiy jihozlar bo‘lmagan va ularni joylashtirishga ham ruxsat berilmagan. Uning hayotini saqlab qolish uchun hech narsa qilinmagan. Bu – Maradona vafot etgan uyda kechgan haqiqiy dahshat sahnasi edi, dedi prokuror.
Prokuror afsonaviy futbolchining o‘limida beparvolik va tibbiy xatoliklar muhim rol o‘ynaganini aytib, asosiy aybni shifokorlarga yukladi. Neyroxirurg Leopoldo Luki va psixiatr Agustina Kosachov “qasddan qilingan qotillik” moddasi bo‘yicha gumonlanmoqda. Agar sud ularni aybdor deb topsa, 8 yildan 25 yilgacha qamoq jazosi berilishi mumkin.
Shuningdek, Maradonaga tibbiy yordam ko‘rsatgan bir necha mutaxassis, jumladan, hamshiralar, klinik shifokor va psixolog ham sud oldida javob beradi.
Sud jarayoni katta shov-shuvlarga sabab bo‘lib, nafaqat mahalliy, balki xalqaro OAV vakillari va Maradonaning muxlislari ham kuzatib bormoqda. Dastlabki rejalarga ko‘ra, sud uch oy davom etishi va 120 kishi guvoh sifatida ko‘rsatma berishi kerak ekanligi aytilmoqda.
Izoh (0)