Иқтисодиёт ва молия вазирлиги 2024 йилдаги давлат қарзи миқдорини маълум қилди.
Қайд этилишича, 2024 йил IV чораги якунида давлат қарзи 40,2 миллиaрд долларга етган. Бу республика ялпи ички маҳсулотининг 35 фоизига тенг.
Давлат кафолати остида олинган кредитларнинг 33,7 миллиард доллари (84 фоизи) ташқи қарз бўлиб, шундан 17,9 миллиард доллари қатъий белгиланган фоиз ставкада жалб қилинган. Қолган 15,64 миллиард доллари ўзгарувчан фоиз ставкаларда олинган. Бироқ қарз таркиби шарҳланмаган, кредитлар неча фоиздан жалб қилингани очиқланмаган.
Ички қарз миқдори 6,5 миллиард долларга яқинлашган (йил бошида 5,9 миллиард доллар бўлган). Шундан 5,1 миллиард доллар қатъий белгиланган фоиз ставкада олинган. Шу билан бирга, 1,2 млрд доллари фоизсиз жалб қилинган.
Охирги беш йилда давлат қарзи миқдорлари қуйидагича ўзгарди:
- 2019 йилда — 17,8 миллиард доллар;
- 2020 йилда — 23,4 миллиард доллар;
- 2021 йилда — 26,3 миллиард доллар;
- 2022 йилда — 29,2 миллиард доллар;
- 2023 йилда — 34,9 миллиард доллар.
Иқтисодиёт ва молия вазирлиги Давлат қарзи департаменти директори ўринбосари Беҳруз Каримовнинг “Дарё”га маълум қилишича, эълон қилинадиган қарзлар ўзлаштирилган маблағлар қолдиғи ҳисобланади.
“Агар бу йил 100 миллион долларлик қарз шартномаси имзоланса, умумий қарз статистикасига бирданига шунча маблағни қўшиб қўймаймиз. Масалан, олинаётган маблағ 5 йил давомида ўзлаштирилиши мумкин. Йилига қанча қисми олинган бўлса, ўша ёзилади”, деди мутахассис.
Вазирлик экспертлари сўзларига кўра, охирги пайтларда япон иенасининг сезиларли қадрсизланиши Ўзбекистон ташқи қарзини 250 миллион долларга камайтирган.
Маълумот учун, 2024 йилда давлат ташқи қарзи жалб қилишнинг қонун билан белгиланган йиллик лимити 5 миллиард доллар эди. Бироқ йил якунида бу миқдор 7,3 миллиард долларга етди. Қонун ижро этилмади. 2025 йилда яна 5,5 миллиард доллар ташқи қарз олиниши белгиланган. Прогнозларга кўра, жорий йил якунида давлат қарзи миқдори 45,1 миллиард долларга етиши (ЯИМга нисбатан 36,7 фоиз) мумкин.
Изоҳ (0)