Global Risk Report hisobotida Markaziy Osiyo uchun 2025-yildagi asosiy xavflar sanab o‘tildi. Mintaqa davlatlari yaqin ikki yilda qator jiddiy tahdidlarga duch kelishi kutilmoqda.
Ekspertlarning taxminiga ko‘ra, geosiyosiy beqarorlik asosiy xavflardan biri bo‘lib qolmoqda. Bunga qurolli to‘qnashuvlar (davlatlararo, ichki, proksi-urushlar), ehtimoliy davlat to‘ntarishlari va xalqaro munosabatlarning keskinlashuvi kiradi.
Shuningdek, hisobotda resurs taqchilligiga alohida e’tibor qaratilgan. Ayniqsa, Qirg‘iziston va O‘zbekistonda bu suv hamda energiya resurslari taqchilligi bilan kuchaymoqda.
Global Risk Report 2025 da qayd etilishicha, ekologik muammolar havoning, suvning va tuproqning ifloslanishida, shuningdek, aholi soni va sanoatning o‘sishi tufayli atrof-muhitga tushadigan yuklamaning ortishida namoyon bo‘lmoqda. Iqtisodiy xavflar qatoriga inflatsiya, narxlarning oshishi, iqtisodiy inqiroz, turg‘unlik va davlat qarzining ko‘payishi kiradi.
Tahlilchilarning fikricha, ijtimoiy muammolar qashshoqlik, tengsizlikning kuchayishi, malakali kadrlar yetishmasligi va “aqlli kadrlar chiqib ketishi” bilan bog‘liq.
The Global Risk Report — bu global xavflar to‘g‘risidagi hisobotdir. U Davosdagi Jahon iqtisodiy forumi tomonidan Syurix va Marsh MakLennan bilan hamkorlikda ishlab chiqilgan.
Hisobotda global xavflarni idrok etish (GRPS) tadqiqoti natijalari keltirilgan bo‘lib, unda 1500 ga yaqin jahon ekspertlarining fikrlari jamlangan. U qaror qabul qiluvchilarga joriy inqirozlar va uzoq muddatli ustuvorliklarni muvozanatlashda yordam berish uchun global xavflarni uchta vaqt oralig‘ida tahlil qiladi.
Izoh (0)