Yangi yil arafasida dunyoning aksariyat poytaxtlari mo‘jizaviy qiyofaga kiradi. Bayram kayfiyati yaratiladi, yorqin gulchambarlar ilinadi, markaziy maydonlarda bir kechada chiroyli archalar paydo bo‘ladi.
London
Odatda Buyuk Britaniya poytaxtini bezash ishlari oktyabr oyidanoq boshlanadi. Bu bayram kayfiyatini oldindan yaratish, shahar aholisini Yangi yil mo‘jizasi muhitiga singdirish uchun qilinadi. Chunki inglizlar uchun Yangi yil eng sevimli va e’zozlanadigan bayramdir.
Avvalo do‘konlarning vitrinalarida o‘zgarish sodir bo‘ladi — toza yuvilib yarqirab turgan oynalar ortida go‘yo bir kechada sehrli tarzda bug‘ularning yorqin shakllari, kichik archalar, eng g‘aroyib shakldagi zanjabil pryaniklari paydo bo‘ladi.
Nyu York
Hayratlanarlisi shundaki, Nyu Yorkda bayram kayfiyatini yaratishni boshqalardan ko‘ra yaxshiroq uddalaydilar. Yangi yil archasi chiroqlarini yoqish marosimi katta bayramga aylanadi.
“Rokfeller markazi”da 30 ming chiroqli gulchambarlar bilan bezatilgan ulkan archa bezatiladi. Bu archa 1931-yildan beri har qish mavsumida su yerda bezatiladi.
Aynan Nyu Yorkda yuzlab Qorbobolarni, tabassum qilayotgan bug‘ularni va u yoki bu do‘kon vitrinasining yaltiroq oynasi ortidan samimiy qo‘l siltayotgan elflarni uchratish mumkin. Markaziy maydonlarning birida ulkan qizil archa o‘yinchoqlari paydo bo‘ladi.
Parij
Parijda Yangi yil yaqinlashayotganini Pringtemps va Galeries Lafayette bosh do‘konlarining vitrinalaridan bilib olish mumkin — bu ikki do‘kon go‘yo bir-biri bilan raqobatlashayotgandek.
Bir necha yil muqaddam savdo markazlarining derazalari ortida mitti hayvonlar paydo bo‘lgan — sichqonlar vertolyotlarda uchishar, mo‘ynali quyonlar esa kankan raqsini ijro etishardi.
Bu yil Parijdagi Yangi yil ranglari orasida oq rang ustunlik qiladi. Masalan, Dior vitrinasi katta kumushrang archa bilan bezatilgan bo‘lib, u go‘yo elita butik joylashgan qadimiy uy devorlari bilan qo‘shilib ketgandek ko‘rinadi.
Afsuski, Fransiya poytaxtida qor kamdan kam hollarda yog‘adi. Har safar qor yog‘ganda fransuzlar uchun haqiqiy bayram bo‘ladi.
Maydonlarda Yangi yil yarmarkalari ish boshlaydi, daraxtlar yaltiroqlar bilan bezatiladi. Yelisey maydonida odamlar orasida tinim yo‘q — bayramoldi tashvishlar har bir kishini shoshishga, yugurishga, peshtaxtalardagi buyumlarni xarid qilishga majbur qiladi, ko‘cha esa minglab chiroqlar bilan porlaydi.
Berlin
Qishki bayramlar arafasida nemislarning favqulodda jiddiyligidan asar ham qolmaydi. Minglab chiroqlar yog‘ilib turgan archalar, qanotli otlar va attraksionlar har qanday xo‘mraygan katta odamni betashvish bolalikka olib ketadi.
Zamonaviy san’at uslubidagi bezaklar ham tez-tez uchraydi: oqshom qorong‘isida to‘kilgan konuslarga o‘xshab ketadigan archalar, katta o‘lchamdagi silindrlar, ular orasida haqiqiy (yoki sun’iy) Yangi yil archalari bayram kayfiyatini yaratadi.
Moskva
Butun dunyo Yangi yil bayramiga tayyorgarlik ko‘rayotgan bir paytda Rossiyada ham bayram shukuhi kezib yuradi. Kuzning o‘zidayoq daraxtlarda dastlabki yaltiroqlar paydo bo‘la boshlaydi, lekin kutilmaganda bayramdan bir necha hafta oldin to‘satdan bejirim, mayda-chuydalargacha e’tibor berilgan ansambl paydo bo‘ladi.
Tverskaya hamisha yulduzli osmon ostida misli ko‘rilmagan porloq yo‘lakka aylanadi — minglab lampochkalar uydan uyga ulanib ketadi.
Praga
Nafaqat qishda, balki yilning boshqa har qanday faslida ham Praga afsonaviy shahar bo‘lib qoladi. Sariq derazali shinamgina mo‘jazgina uychalar qad ko‘tarib turadi, Staromest maydonida grog va glintveyn sotiladi, oqshom qorong‘isida miltillab turgan farishtalar mo‘jiza boshlanishiga yaqin qolgani, ozgina sabr qilish kerakligini ta’kidlayotgandek go‘yo.
Musiqachilar va ko‘cha artistlari improvizatsiya qilingan sahnalari bilan tomoshabinlarni xursand qilish uchun Qorli ko‘prik oldida to‘planishadi. Agar bolaligingizdagi ertakni eshitishni istasangiz — Pragaga boring, mo‘jizalar bu yerda har yili sodir bo‘ladi.
Rim
Rimda sovuq bo‘lmaydi. Dekabr kunlarida boqiy shahar bog‘larida atirgullar va apelsin daraxtlari gullaydi. Kunduzi havo harorati +15 daraja atrofida bo‘ladi, kechalari +7 darajagacha pasayadi. Yangi yil kuni yashil maysazorlarda yengil kiyim kiygan, shampan ichib o‘tirgan yoshlarni uchratish mumkin.
Italyanlar bayramlarni yaxshi ko‘rishadi. Minglab chiroqlar va mazali taomlar qanchalik ko‘p bo‘lsa, kelayotgan yil shunchalik baxtli bo‘ladi.
Izoh (0)