Ўқ отиш, гандбол ва сузиш федерацияларига раислар сайланди

Ўзбекистон ўқ отиш, гандбол ва сузиш федерацияларига раислар сайланди. Бу ҳақда МОҚ матбуот хизмати хабар берди.

Маълум қилинишича, Миллий Олимпия қўмитасида Ўзбекистон ўқ отиш спорти федерациясининг навбатдан ташқари ҳисобот-сайлов конференцияси бўлиб ўтди. Унда федерация раислигига мудофаа вазири, генерал майор Шухрат  Халмухамедов сайланди.

Тадбирда ўқ отиш федерациясининг Лос Анжелес-2028 ёзги Олимпия ўйинларига тайёргарлик режаси кўриб чиқилди.

Шунингдек, МОҚда гандбол федерациясининг навбатдан ташқари ҳисобот-сайлов конференцияси ташкил этилди. Унда федерацияга янги раҳбар сайланди ва Лос Анжелес-2028 ёзги Олимпия ўйинларига тайёргарлик режаси кўриб чиқилди.

Тадбирда “Навоий кон-металлургия комбинати”нинг бош директори, Ўзбекистон Қаҳрамони Қувондиқ Саноқулов номзоди Ўзбекистон гандбол федерацияси раиси лавозимига илгари сурилди. Делегатлар ушбу номзодни бир овоздан маъқуллади.

Бундан ташқари, сузиш федерациясининг ҳам навбатдан ташқари ҳисобот-сайлов конференцияси бўлиб ўтди. Кун тартибидан федерацияга янги раҳбар сайлаш масаласи ўрин олди.

Сузиш федерацияси раҳбари лавозимига Ўзбекистон касаба уюшмалари федерацияси раиси Қудратилла Рафиков номзоди илгари сурилди. Тадбирда қатнашган делегатлар ушбу номзодни бир овоздан маъқуллади.

Тадбир давомида федерациянинг Лос Анжелес-2028 ёзги Олимпия ўйинларига тайёргарлик режаси батафсил кўриб чиқилди.