“Камбағалликдан фаровонлик сари” дастурини амалга оширишга фаол нуронийларни жалб этиш чора-тадбирлари тўғрисида”ги президент қарори қабул қилинди.
Қарор билан маҳаллаларда катта ҳаётий тажрибага эга бўлган обрў-эътиборли уч нафар фаол нуроний бешта камбағал оилага олти ойга бириктирилади. “Маҳалла еттилиги” оилаларнинг ижтимоий-иқтисодий аҳволини яхшилашда фаол нуронийларга яқиндан ёрдам беради.
Оилаларни камбағалликдан чиқаришда нуронийларнинг асосий фаолият йўналишларида қуйидагилар амалга оширилади:
- хонадон томорқасидан самарали фойдаланиш ва кичик ишлаб чиқариш ускуналари ва бошқа зарур техника воситаларини бўлиб тўлаш шарти билан ижарага олишга ёрдамлашиш;
- оила фарзандларини ҳунарманд ва усталарга шогирдликка бириктириш, шунингдек, ушбу оилаларнинг таълим муассасаларида ўқиётган фарзандларини ўқув жиҳозлари ва қуроллари ҳамда спорт кийимлари билан таъминлаш;
- пиёда юриш маданиятини тарғиб қилиш;
- кекса ёшдаги фуқаролар учун мос келадиган спорт тадбирларини ташкил этиш, уларни жисмоний тарбия ва спорт билан шуғулланишга жалб этиш.
Фаол нуронийларнинг тавсиясига мувофиқ камбағал оила фарзандларининг таълим олишлари учун қулай шарт-шароит яратиш мақсадида ўқув жиҳозлари ва қуроллари ҳамда спорт кийимларини харид қилиш харажатлари “Нуроний” жамғармаси маблағлари ҳисобидан қоплаб берилади.
Ҳар бир маҳаллада “Нуронийлар ва она-оналар кенгаши” ташкил қилиш орқали маҳаллаларда ижтимоий-маънавий муҳит барқарорлиги таъминланади. Нуронийлар муаммоли ва боқимандалик кайфиятига тушиб қолган оилалар билан ҳам ишлаши лозим.
Фаол нуронийлар ҳар ойда меҳнатга ҳақ тўлашнинг энг кам миқдори (1 млн 155 минг сўм)нинг 50 фоизи — 577 500 сўм миқдорида рағбатлантириб борилади.
Ушбу қарорда белгиланган вазифаларни амалга ошириш мақсадида 2025 йил учун давлат бюджети параметрларида 504 миллиард сўм маблағ ажратилади. Кейинги йилларда ҳам зарур маблағлар ажратиб борилади.
Ўзбекистонда камбағалликни қисқартириш
Шавкат Мирзиёев маҳаллаларда камбағалликни қисқартириш, камбағал оилалар билан ишлаш тизимини янги босқичга олиб чиқиш чора-тадбирлари юзасидан 2024 йилнинг сентябрида ўтказган видеоселектор йиғилишида Ўзбекистонда камбағалликни қисқартириш умуммиллий ҳаракатга айланишини, “Камбағалликдан фаровонлик сари” дастури тайёрланаётганини айтганди. Дастур шу йилнинг ўзида 500 минг, 2025 йилда яна 1 миллион кишини камбағалликдан чиқаришга қаратилган.
24 сентябрь куни “Камбағалликни қисқартириш ва аҳоли турмуш фаровонлигини ошириш борасидаги чора-тадбирларни янги босқичга олиб чиқиш тўғрисида”ги президент фармони қабул қилинди. Ҳужжат билан “Камбағалликдан фаровонлик сари” дастури амалга оширилиши белгиланди.
Шавкат Мирзиёев маҳаллаларда камбағалликни қисқартириш, камбағал оилалар билан ишлаш тизимини янги босқичга олиб чиқиш чора-тадбирлари юзасидан 11 сентябрь куни ўтказилган видеоселектор йиғилишида “Одамларга қанча ёрдам бермайлик, маҳаллалар шароитини яхшиламасак, камбағаллик қисқармайди”, деб айтганди.
Шу боис келгуси йилда маҳаллалар инфратузилмасини ривожлантиришга барча манбалардан 1,6 миллиард доллар ажратилади. Бу маблағларнинг 1,2 триллион сўми, аввало, энг оғир 300 та маҳаллада сув насослари ва қуёш панеллари ўрнатишга берилади. Яна 2 триллион сўм ҳисобидан энг оғир 500 та маҳаллада электр, йўл, интернет ва бошқа инфратузилма масалалари ҳал этилади.
Ўзбекистонда камбағалликни қисқартириш ва аҳолини ижтимоий ҳимоя қилиш мақсадида келгуси йили бюджетдан 500 миллиард сўм йўналтирилади. Бу ҳақда давлат раҳбари 19 ноябрь куни Сенатнинг парламент сайловидан кейинги биринчи мажлисида эълон қилган.
Изоҳ (0)