Россия Ўзбекистонда фуқаролик дронларини ишлаб чиқаришни йўлга қўйишни таклиф этди. Бу ҳақда икки давлат ҳукумат раҳбарлари даражасидаги қўшма комиссия йиғилишида Россия бош вазири Михаил Мишустин маълум қилди.
Москва ва Тошкент “республикада фуқаролик учувчисиз ҳаво тизимлари ва уларнинг компонентларини ишлаб чиқаришни маҳаллийлаштириш имкониятини кўриб чиқмоқда”, деди Мишустин.
Шунингдек, Россия Ўзбекистонда темирйўл машинасозлиги соҳасида ишлаб чиқаришни йўлга қўймоқчи.
Мишустиннинг Ўзбекистонга ташрифи
Россия бош вазири 9 сентябрь куни Ўзбекистонга расмий ташриф билан келди. Уни аэропортда бош вазир Абдулла Арипов кутиб олди. Шу куни икки давлат ҳукумати раҳбарлари даражасидаги қўшма комиссиянинг бешинчи мажлиси бўлиб ўтди.
Кейинги етти йилда Ўзбекистон ва Россия ўртасидаги товар айирбошлаш ҳажми 2,5 баравар кўпайди. Жорий йилнинг 7 ойида эса товар айирбошлаш ҳажми яна 30 фоизга ошган. Мажлисда давлатлар раҳбарлари томонидан ҳукуматлар зиммасига ўзаро товар айирбошлаш ҳажмини яқин йилларда 30 миллиард долларгача етказиш вазифаси қўйилгани, бунга эришиш учун ҳамкорлик лойиҳаларини амалга ошириш ҳамда импорт ўрнини босиш бўйича аниқ қўшма чора-тадбирларни амалга ошириш лозимлиги таъкидланган.
Мажлисда истиқболли сармоявий лойиҳалар ва савдо шартномаларининг амалга оширилишини таъминлаш ва маданий-гуманитар ҳамкорликни чуқурлаштириш режалари кўрилган. Учрашув якунлари бўйича қўшма коммюнике қабул қилинган, бир қатор ҳукуматлараро ва идоралараро ҳужжатлар имзоланган.
10 сентябрь куни президент Шавкат Мирзиёев Россия бош вазири бошчилигидаги делегацияни қабул қилди. Музокаралар давомида Ўзбекистон билан Россия ўртасидаги кўп қиррали ҳамкорлик, кенг қамровли стратегик шериклик ва иттифоқчилик муносабатларини янада кенгайтириш масалалари муҳокама қилинди. Россия президентнинг жорий йил 26—28 май кунлари Ўзбекистонга давлат ташрифи чоғида қабул қилинган қарор ва келишувларни амалга оширишга алоҳида эътибор қаратилди. Шунингдек, учрашув давомида томонларни қизиқтирган масалалар юзасидан фикр алмашилди.
Изоҳ (0)