Германия молия вазири Кристиан Линднерга кўра, Украинада уруш бошланганидан кейин мамлакат таъминотни диверсификация қилиб, Россия энергия манбаларига қарамликдан халос бўлган. Бу ҳақда BBC хабар бермоқда.
«Ҳа, албатта, Германия ҳали ҳам энергия импортига қарам. Аммо энди бу қарамлик Россияга эмас, балки жаҳон бозорларига боғлиқ», — деди Линднер.
Энергетика инфратузилмасини диверсификация қилиш доирасида Германия кўмирда ишлайдиган электр станцияларини қайта очди ва қолган учта атом электр станциясини ёпиш режаларини тўхтатди.
Бундан ташқари, Германия Норвегия, АҚШ ва бошқа мамлакатлардан олиб келинган табиий газ учун қўшимча омборхоналар ташкил этди.
Жумладан, Линднер Давосдаги Жаҳон иқтисодий форумида қайд этганидек, мамлакатда суюлтирилган газ учун терминал рекорд даражадаги тез — саккиз ой ичида қурилган.
«Биз канцлер Ангела Меркель давридан кейин рақобатбардошлигимизни оширишимиз кераклигини англадик. Ўша давр ўтмишнинг кучли томонларига қаратилган эди ва ҳозир биз келажакнинг кучли томонларини ривожлантирмоқдамиз», — деди у.
2022 йил февраль ойида Россия қўшинларининг Украинага кенг кўламли бостириб кириши бошланишидан олдин Германия Россиядан истеъмол қилинган газ ҳажмининг ярмини ва нефтнинг учдан бир қисмини импорт қилган.
Уруш бошланганидан кўп ўтмай, Германия Россия нефтидан воз кечди. Россия, ўз навбатида, Ғарбий Европага газ етказиб беришни кескин қисқартирди ва август ойининг охиридан бошлаб буни бутунлай тўхтатди.
Россиядан газ импорт қилувчи мамлакатлар қиш мавсуми бошланишидан олдин бунга тайёргарлик кўриш ва етарли энергия захирасини яратишга муваффақ бўлди.
Мавзуга доир: Германия иккинчи LNG терминалини ишга туширди
Изоҳ (0)