Футзал бўйича жаҳон чемпионати А гуруҳи 3-туридан ўрин олган Коста-Рика — Ўзбекистон (5:3) учрашувидан сўнг меҳмонлар аъзоси Минор Сабалсета ўзбекистонликларнинг мағлубиятига нима сабаб бўлганини айтди.
“Ўзбекистонга қарши яхши ўйин ўтказдик. Ҳисобда ортда бораётганимизга қарамай, асосийси, шижоатни йўқотмадик ва интилишда давом этдик. Натижада матонатимизни намойиш этган ҳолда, даставвал ҳисобни тенглаштирдик, сўнгра ғалаба тўпини киритдик. Биз ажойиб ишни уддаладик, яъни плей-офф йўлланмасини қўлга киритдик. Жамоа хурсандчилигининг чеки йўқ.
Ўзбекистон ҳиссиётларга жуда берилувчан жамоа экан. Улар 3:2 ҳисобида олдинда бораётганди. Биз ҳисобни тенглаштиргач, мезбонларда саросима юзага кела бошлади. Бу эса рақиб дарвозаси томон йўл топишимизда калит вазифасини бажарди ва биз яна иккита гол урдик. Кейинги босқичда қайсидир гуруҳ ғолиби билан тўқнаш келамиз. Албатта, бу баҳс бизга етарлича қийинчилик туғдиради. Аммо бугунги учрашувда бўлгани каби ғалаба қозониш учун бор имкониятларимизни ишга соламиз”, деди учрашувнинг энг яхши ўйинчиси Минор Сабалсета.
Маълумот учун, Ўзбекистон устидан қозонилган ғалаба эвазига Коста-Рика А гуруҳида 3-ўринни эгаллаган ҳолда нимчорак финал йўлланмаси эгасига айланди. Энди улар нимчорак финалда Б ёки C гуруҳи ғолибларидан бири билан тўқнаш келади.
Изоҳ (0)