“Реал Мадрид” ҳужумчиси Винисиус Жуниорнинг клуб ичидаги муносабатлари ёмонлашмоқда. Жамоадаги кўпчилик футболчининг хатти-ҳаракатидан норози, дея хабар берди Cadena Ser.
“У ўзини тутиш тарзини ҳозироқ ўзгартириши керак, чунки бу сабабли клуб ичида унга бўлган қўллаб-қувватлаш пасаймоқда. Винисиус август ойидаги ўйинларда яхши иштирок этди, аммо ҳозир вазият ўзгарди ва клубда унга олдинга қадам ташлаш вақти етганлиги ҳақида гапираётганлар кўпаймоқда.
Асосий сабаб шундаки, футболчи “Реал”га келганидан бери клуб унга кўрсатаётган қўллаб-қувватлашдан фойдалана олмаяпти. Клуб уни ҳимоя қилаётганини ва жамоадошлари ёрдамини кўрди, аммо ҳозирги Винисиус уларга ёқмаяпти. Бразилиялик футболчи турли маиший муаммоларга эътибор қаратмоқда ва у футбол ўйнашдан чалғимоқда. Тўғри, у голлар уришда давом этяпти, лекин мен Винининг ҳолатидан хавотирланяпман. Аввалига бу унчалик муҳим бўлиб туюлмаганди, аммо сўнгги ҳафталарда бу борада хавотир сездим. Винининг фикрича, фақатгина Анчелотти уни тушунади ва унинг тарафини олади”, дея журналистнинг сўзларини келтиради нашр.
Эслатиб ўтамиз, аввалроқ Винисиус агар мамлакатда ирқчилик билан боғлиқ вазият ўзгармаса, Испания кейинги Евро ўйинларини ўтказиш ҳуқуқидан маҳрум этилиши кераклигини айтган эди. Бу баёнот бразилияликка нисбатан катта салбий муносабатга сабаб бўлди.
Изоҳ (0)