Carnival Spirit kruiz layneri Alyaskadagi Treysi-Arm ko‘rfazida suzib ketayotib muz bo‘lagi bilan to‘qnashib ketdi. Bu haqda CNN xabar berdi.
Yo‘lovchilardan biri hazillashib, voqeani “Titanik”ning halokatga uchrashiga o‘xshatgan. Hodisa oqibatida hech kim jabrlanmagan, biroq ko‘plab yo‘lovchilar qo‘rquvni boshdan o‘tkazgan.
Carnival Cruise Line kompaniyasi vakili hodisa harakatlanuvchi muz bilan to‘qnashuv tufayli sodir bo‘lganini tasdiqlagan. Mutaxassislar layner holatini baholaguncha u bir necha soat bir joyda turgan. Hech qanday zarar qayd etilmagan va kruiz harakatlanishda davom etgan.
Kruiz laynerining ulkan muz bilan to‘qnashuvi yo‘lovchilarni beixtiyor “Titanik”ning fojiali tarixini eslashga majbur qilgan. Darvoqe, bu holatda gap aysberg haqida borayotgani yo‘q, shuning uchun taqqoslash unchalik to‘g‘ri emas.
Layner kruizni Sietlda yakunlagan. Ko‘p o‘tmay, Carnival Spirit xuddi shu yo‘nalish bo‘ylab yangi ikki haftalik sayohatga yo‘l olgan. Kompaniya voqea kemaning ishiga va uning keyingi reyslariga hech qanday ta’sir ko‘rsatmaganini ta’kidlagan.
Alyaska suvlari kruiz kemalari uchun eng murakkab navigatsiya hududlaridan biri hisoblanadi. Shunga qaramay, u sayyohlar orasida juda ommalashgan. Mutaxassislar ta’kidlashicha, zamonaviy kruiz laynerlari turli xil sharoitlarda harakatlanishga moslashtirilgan. Bundan tashqari, sayohatlar uchun Alyaska xususiyatlarini yaxshi biladigan eng tajribali kapitanlar tanlanadi. Mutaxassislar bunday hodisalarning aksariyati kemalar uchun xavf tug‘dirmasligini aytmoqda.
Izoh (0)