“Ўзбекистон Республикасининг “Ўзбекистон Республикасида хизмат кўрсатган тадбиркор” фахрий унвонини таъсис этиш тўғрисида”ги қонун қабул қилинди. Унга кўра, “Ўзбекистон Республикасида хизмат кўрсатган тадбиркор” фахрий унвони таъсис этилди.
![](/static/2024/09/04/photo_2024-08-16_09-51-55-8mMfRmy6.jpg)
Фахрий унвон бизнеснинг янги, юқори даромадли йўналишларини йўлга қўйган, соҳага инновацияларни кенг жорий қилиш, замонавий ишлаб чиқариш қувватларини барпо этиш, экспорт салоҳиятини ошириш, хорижий ва маҳаллий инвестицияларни фаол жалб қилиш, янги иш ўринларини яратиш орқали Ўзбекистон иқтисодиётини ривожлантириш ҳамда аҳоли фаровонлигини юксалтиришга муносиб ҳисса қўшиб келаётган, шунингдек, ўз фаолияти давомида давлат органлари билан ўзаро ҳамкорликни амалга ошириб, ижтимоий лойиҳалардаги фаоллиги билан бошқаларга намуна бўлаётган, бизнес юритишда катта тажрибага эга, илғор ва ташаббускор тадбиркорлик субъектлари раҳбарлари ва таъсисчиларига берилади.
Қонун расмий эълон қилинган кундан эътиборан кучга кирди.
“Ўзбекистонда хизмат кўрсатган тадбиркор” фахрий унвонини таъсис этишни президент Шавкат Мирзиёев тадбиркорлар билан очиқ мулоқотда таклиф қилган эди. давлат раҳбари қурувчи, маданият, таълим каби соҳа вакиллари учун фахрий унвонлар мавжудлигини, лекин, Янги Ўзбекистон пойдеворини яратишга энг катта ҳисса қўшиб келаётган тадбиркорлар эътибордан четда қолгани адолатдан эмаслигини айтганди.
28 август Сенат ялпи мажлисида ушбу қонун кўриб чиқилиб, маъқулланганди. Қонунга кўра “Ўзбекистон Республикасида хизмат кўрсатган тадбиркор” фахрий унвонини таъсис этилиши муносабати билан “Ўзбекистон Республикасининг фахрий унвонларини таъсис этиш тўғрисида”ги ва “Давлат мукофотлари тўғрисида”ги қонунларга тегишли ўзгартириш ва қўшимчалар киритилади.
31 август куни ушбу унвон Жиззах вилояти Шароф Рашидов туманидаги “Гулчи опа томорқа хизмати” кластери раҳбари Шарофат Нориевага берилди.
Изоҳ (0)