Монголия расмийлари Россия президенти Владимир Путинни Халқаро жиноий суд буйруғи билан ҳибсга олишдан бош тортишини мамлакатнинг энергияга қарамлиги ва бетарафлиги билан изоҳлади. Бу ҳақда Politico ҳукуматнинг Улан-Батордаги вакилига таяниб хабар берди.
Хабарга кўра, Монголия нефть маҳсулотларининг 95 фоизини ва электр энергиясининг 20 фоиздан ортиғини қўшни давлатлардан импорт қилади.
“Ушбу таъминотлар бизнинг мавжудлигимиз ва халқимизнинг мавжудлигини таъминлаш учун жуда муҳим. Монголия ўзининг барча дипломатик муносабатларида доимо бетарафлик сиёсатини сақлаб келган”, дейди расмий Politico’га.
Исмини ошкор этмаган ҳуқуқшуноснинг таъкидлашича, ўзи аъзо бўлган ХЖС буйруғига риоя қилмагани сабабли Монголия жиноий жавобгарликка тортилиши мумкин.
Путиннинг Улан-Баторга ташрифи олдидан Европа Иттифоқи, Украина ҳамда Халқаро Амнистия ва Human Rights Watch каби халқаро инсон ҳуқуқлари ташкилотлари Монголияни ХЖС бўйича ўз мажбуриятларини бажаришга чақирган эди.
Путин Монголияга мамлакат президенти Ухнаагиин Хурельсухнинг таклифига биноан совет ва мўғул қўшинларининг Япония устидан қўшма ғалабасининг 85 йиллигига бағишланган тадбирда иштирок этиш учун ташриф буюрган эди. Бу Россия президентининг суд унга ҳибсга олиш учун ордер берганидан бери ХЖСнинг Рим статутини имзолаган мамлакатга биринчи ташрифидир. Монголия 2000 йилда Рим статутини имзолаган ва 2002 йилда уни ратификация қилган.
Изоҳ (0)