Ўзбек халқининг бой ва қадимий мусиқа санъати ҳар доим Шарқ халқлари маданияти орасида алоҳида ўрин тутиб келган. Унинг бу мавқеи халқ ижодиёти билан узвий боғланганлиги сабабли ҳозирги замонда ҳам тобора ошиб бормоқда. Бу йилги “Шарқ тароналари” XIII халқаро мусиқа фестивали ана шу қадриятларни янада юксалтиришни мақсад қилган.
2024 йил 26-30 август кунлари Самарқанд шаҳрида ЮНЕСКО ва АЙСЕСКО шафелигида “Шарқ тароналари” XIII халқаро мусиқа фестивали ўтказилади. 1997 йилда илк марта ўтказилган бу фестивалга бу йил дунёнинг 70 дан ортиқ мамлакатида 300 нафардан зиёд вакиллар ташриф буюради.
Фестивал доирасида 2024 йил 27-28 август кунлари Юнус Ражабий номидаги Ўзбек Миллий мусиқа санъати институтида “Шарқ халқлари мусиқа маданияти: глобаллашув жараёнларида ижодий уйғунлашув тамойиллари” мавзусида халқаро илмий-амалий конференция ўтказилиши режалаштирилган.
Конференцияда 32 хорижий давлатдан 46 нафар мусиқашунос, фолклоршунос ва маданияцҳунос олимлар, шунингдек, нуфузли олий таълим муассасалари ректорлари ва илмий-ижодий марказлар раҳбарлари иштирок этади. Бу нуфузли иштирокчилар конференциянинг нуфузини янада оширади.
Конференция давомида соҳа мутахассислари миллий мусиқа санъатини туркий давлатлар мусиқа маданияти билан уйғунлаштириш, инновацион таълим технологияларини кенг жорий этиш каби масалаларни муҳокама қиладилар. Шу билан бирга, TURKSOY қошидаги “Туркий давлатлар санъат университетлари иттифоқи” резолюцияси қабул қилиниши ва турли давлатлар олий таълим муассасалари ўртасида ҳамкорлик меморандумлари имзоланиши режалаштирилган.
Шунингдек, Хитой, Франция, Россия, Германия, Гамбия, Уммон ва Иордания давлатларидаги олий ўқув юртлари, халқаро илмий тадқиқот марказлари билан жами 12 та ўзаро ҳамкорлик шартномалари ҳам имзоланади. Ушбу ҳамкорликлар қўшма ижодий лойиҳалар, халқаро фестиваллар ва танловлар ташкил этиш, профессор-ўқитувчилар томонидан маҳорат дарслари ўтказиш, илмий тадқиқотлар ва назарий маърузалар ўқиш каби соҳаларни қамраб олади.
Конференциянинг яна бир муҳим қисми “Мақом капсуласи” тақдимоти бўлиб, бу илмий анжуманнинг энг ижодий чўққиси сифатида таърифланмоқда. Мақом капсуласи илмий янгилик бўлиб, унда ҳар бир мақомнинг ижро вақти ҳамда унинг инсон руҳиятига ижобий таъсири тўғрисидаги маълумотлар жамланган “Қўллаш бўйича йўриқнома” ҳам тақдим этилади.
Конференциянинг илмий натижалари ва хулосалари, шунингдек, сараланган энг яхши мақолалар жамланган “Мақолалар тўплами” нашр этилган бўлиб, иштирокчи ва меҳмонларга совға қилинади. Шунингдек, ҳар бир иштирокчи Ўзбекистон Республикаси маданият вазири томонидан халқаро сертификат ва эсдалик совғалари билан тақдирланади.
Изоҳ (0)