ДХХ сериал учун рухсатнома олиш, ишга ва ўқишга киритиб қўйиш эвазига пул олган шахслар ушланганини маълум қилди.
ДХХ ходимлари томонидан Бош прокуратура ҳузуридаги департамент билан ҳамкорликда ўтказилган тезкор тадбирда Тошкент шаҳрида яшовчи, 1975 йилда туғилган фуқаро ўзини гўёки “Ўзбекфильм”да масъул лавозимда ишловчи шахс сифатида таништириб, Тошкент вилоятидаги жазони ижро этиш муассасасида жазо ўтаётган маҳкума аёл ҳаётига бағишланган кўп қисмли сериални суратга олиш учун Кинематография агентлиги ҳузуридаги бадиий кенгашда ишловчи танишлари орқали рухсат олиб бериш эвазига 20 минг доллар олган вақтида ашёвий далиллар билан ушланган.
“Навоий кон-металлургия комбинати” акциядорлик жамиятига қарашли Жанубий кон бошқармасининг бўлим бошлиғи ўринбосари Қўшработ туманида яшовчи икки нафар фуқарони ушбу кон бошқармасига ишга киритиб қўйиш эвазига 5 минг доллар олган вақтида Давлат хавфсизлик хизматининг Самарқанд вилояти бўйича бошқармаси ҳамда Иқтисодий жиноятларга қарши курашиш департаменти ходимлари томонидан ушланган.
Терговга қадар текширув давомида аниқланишича, мазкур шахс 2023 йилнинг сентябрь ойида “Зармитан” конига ишга жойлаштириб қўйишини айтиб, Қўшработ туманида истиқомат қилувчи тўрт нафар фуқародан жами 9 минг доллар олган ва ўз эҳтиёжлари учун ишлатиб юборган.
ДХХнинг Тошкент вилояти бўйича бошқармаси ва Бош прокуратура ҳузуридаги департаментнинг ҳудудий бошқармаси ходимлари ҳамкорлигида ўтказилган тезкор тадбирда консалтинг фирма раҳбари ўзининг юқори лавозимларда ишловчи танишлари орқали, пойтахтлик фуқарога чет тилини билиш бўйича миллий сертификат олиб бериб, уни Тошкент давлат юридик университетининг магистратура босқичига ўқишга киритиб қўйиши эвазига 3500 доллар олган вақтида ушланган.
Ҳозирда учала шахсга нисбатан жиноят ишлари қўзғатилган.
Изоҳ (0)