Қашқадарё вилояти, Шаҳрисабз туманида яшовчи аёл Н.А. ўзининг уйида вояга етмаган Ч.Т.ни 7 ой давомида мажбуран сақлаб келиб, зўрлик ва таҳдид орқали уни турли шахслар билан жинсий алоқа қилишга мажбурлаб келгани ҳақида хабар берилган эди.
Ушбу ҳолат юзасидан 2023 йилнинг ноябрь ойида жиноят иши қўзғатилиб, тергов гуруҳи тузилган ва тезкор равишда тергов ҳаракатларига киришилганди.
Болалар омбудсмани матбуот хизматининг хабар беришича, Жиноят ишлари бўйича Шаҳрисабз туман судида вояга етмаган (2009 йилда туғилган қиз)га нисбатан содир этилган жинсий жиноятлар юзасидан ёпиқ тарздаги суд муҳокамаси бўлиб ўтди.
Суд 2024 йилнинг 8 апрель куни ишни ҳар томонлама, холисона ўрганган равишда мавжуд далиллардан ва иш учун аҳамиятли бошқа ҳолатлардан келиб чиқиб, судланувчиларни айбли деб топди.
Жумладан, судланувчи Н.А. (аёл) ЖКнинг 135-моддаси 3-қисмининг “а,г” бандлари (одам савдоси) ҳамда 127- моддасининг 3-қисми (вояга етмаган шахсни ғайриижтимоий хатти-ҳаракатларга жалб қилиш) билан 7 йил 6 ой муддатга озодликдан маҳрум қилинди.
Судланувчилар А.Ф. (эркак) ва Ш.У. (эркак) ЖКнинг 118-моддаси 3-қисмининг “а” банди (номусга тегиш), 135-моддаси 3-қисмининг “а,г” бандлари (одам савдоси), 127-моддасининг 3-қисми (вояга етмаган шахсни ғайриижтимоий хатти-ҳаракатларга жалб қилиш) билан айбли деб топилиб, уларга 9 йил муддатга озодликдан маҳрум қилиш жазоси берилди.
Мазкур ҳукм юзасидан судланувчилар томонидан апелляция тартибида шикоят берилган бўлиб, Қашқадарё вилояти суди апелляция тартибида мазкур шикоятларни кўриб чиқди ва биринчи инстанция суди ҳукмини ўзгаришсиз қолдирди.
“Таъкидлаш жоизки, бу тоифадаги жиноятлар учун жавобгарликнинг янги тартибига биноан мазкур ҳукм бўйича маҳкумларга нисбатан жазони юмшатиш ҳеч бир чораси қўлланилмайди ва жазо тўлиқ ўталади. Вояга етмаган жабрланувчи Ч.Т.га жиноят иши юритуви давомида ва ҳозирда болалар омбудсмани ва тегишли ташкилотлар томонидан зарур бўлган барча ижтимоий ҳуқуқий ва психологик кўмак кўрсатилмоқда”, дейилади хабарда.
Изоҳ (0)