Июль ойининг сўнгги кунларида Саудия Арабистонида бутунжаҳон 56-Халқаро Менделеев кимё олимпиадаси ўтказилди. Унда 87 та давлатдан 340 дан ортиқ иқтидорли ўқувчилар иштирок этди. Ўзбекистон номидан қатнашган ўқувчилар 1 та олтин, 2 та кумуш ва 1 та бронза медалини қўлга киритишди.
Суҳбатдошимиз Далер Раҳимов олимпиадада олтин медал соҳиби бўлди. У пойтахтдаги Абу Али ибн Сино мактабининг 10-синфида таҳсил олади. Далер Раҳимов олимпиададан олган таассуротларини “Дарё” билан ўртоқлашди.
— Кимё фанига қизиқишимга ота-онам ва устозларим сабабчи бўлган. Кичик ёшимдан бошлаб, аниқ фанларга қизиққанман. Кейинчалик кимё ва физика фанига бўлган қизиқишим ҳам ортган. Халқаро олимпиадалар ҳақида эшитиб, менда уларда иштирок этиш мақсади пайдо бўлган.
Абу Али ибн Сино мактабига қабул қилинганимдан кейин жамоа билан халқаро олимпиадаларга тайёрландик. Иштирок этиш давомида албатта ҳаяжон бўлади. Чунки Ўзбекистон шаънини ҳимоя қилиш масъулияти бор.
Олимпиадада 87 тадан ортиқ давлатдан иштирокчилар қатнашди. Улар билан фикр алмашдик, таълим тизими ҳақида қизиқдик. Бу йилги кимё олимпиадасида лаборатория босқичи бир оз қийинроқ кечди. Шу боис баллар бир оз паст бўлгани ҳақида айтишди.
Ўзбекистон жамоаси муваффақиятли иштирок этишида устозларимизнинг ҳиссаси катта. Тайёргарлик жараёнида устозларимиз биздан кўпроқ меҳнат қилишди. Уларнинг ишончи ва берган билимлари бизга қўл келди. Келажакда хориж тилини ўрганиб, янада нуфузли халқаро олимпиадаларда иштирок этиш ниятим бор, — дейди Далер Раҳимов.
Эслатиб ўтамиз, Халқаро фан олимпиадалари ғолибларига давлат бюджетидан қуйидагича пул мукофоти берилади:
1-ўринга — 170 млн сўм, устозига — 153 млн сўм;
2-ўринга — 102 млн сўм, ғолибнинг устозига — 85 млн сўм;
3-ўринга — 68 млн сўм, ғолибнинг устозига — 51 млн сўм.
Ушбу ўқувчилар давлат ОТМларига тест синовисиз ва қўшимча имтиҳонсиз грант асосида талабаликка қабул қилинади.
Изоҳ (0)