Ўзбекистоннинг қатор ҳудудларида электр ва газдан ноқонуний фойдаланиш ҳолатлари аниқланди

Ўзбекистоннинг қатор ҳудудларида электр ва газдан ноқонуний фойдаланиш ҳолатлари аниқланди, деб хабар бермоқда Прокуратура департаменти. 

Унга кўра, Бош прокуратура ҳузуридаги департаментнинг Каттақўрғон ва Оқдарё тумани ҳамда Самарқанд шаҳри бўлимлари томонидан ЭТК ходимлари билан ҳамкорликда терговга қадар текширувлар ўтказилган. “Ҳ.А.” фермер хўжалиги, “Р.Ф.” ҳамда “О.И.” МЧЖлар масъул шахслари умумий фойдаланишдаги электр ва табиий газ тармоқларига ўзбошимчалик билан уланиб, жами 727,6 млн сўмлик энергия ресурсларидан ноқонуний фойдалангани аниқланган. 

Шу каби, департаментнинг Урганч, Ғузор туман бўлимлари ва Сурхондарё вилоят бошқармаси томонидан ўтказилган терговга қадар текширувларда ушбу ҳудудлардаги “Б.О.”, “Т.С.” ва “Қ.Ч.” фермер хўжаликлари масъул шахслари электр сув насосларини ўзбошимчалик билан тўғридан тўғри тармоққа улаб, жами 504,6 млн сўмлик электр энергиясидан ноқонуний фойдалангани аниқланган.

Департаментнинг Марғилон шаҳар бўлими томонидан ўтказилган терговга қадар текширувда эса “Ж.С.” МЧЖ масъул шахслари корхонанинг умумий овқатланиш шохобчасининг электр ҳисоблаш ускунасига ташқи таъсир ўтказиб, 232,2 млн сўмлик электр энергиясидан ноқонуний фойдалангани аниқланган. 

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.