“Аҳоли бандлиги тўғрисидаги қонунга ўзгартириш ва қўшимчалар киритиш ҳақида”ги қонун лойиҳаси жамоатчилик муҳокамаси учун эълон қилинди.
Қонун лойиҳаси билан “Аҳоли бандлиги тўғрисида”ги қонунга қуйидаги ўзгартиришлар киритилади:
- маҳаллий меҳнат органлари томонидан иш қидираётган шахсларга ва ишсиз шахсларга кўрсатиладиган хизматлар турларига “Инсон” ижтимоий хизматлар марказлари талабномаси асосида маҳаллий меҳнат органларига рўйхати тақдим этилган тазйиқ ва зўравонликдан жабр кўрган тегишли билим ва кўникмаларга эга бўлган хотин-қизларни давлат органлари ва ташкилотларига йўлланма асосида ишга жойлаштириш хизмати киритилмоқда;
- “Инсон” ижтимоий хизматлар марказлари талабномаси асосида маҳаллий меҳнат органларига рўйхати тақдим этилган тазйиқ ва зўравонликдан жабр кўрган тегишли билим ва кўникмаларга эга бўлган хотин-қизлар иш қидираётган шахслар сифатида маҳаллий меҳнат органларида уларнинг мурожаатисиз рўйхатга олиниши тартиби белгиланмоқда;
- маҳаллий меҳнат органлари томонидан йўлланма асосида ишга юборилган шахсларни, шу жумладан, “Инсон” ижтимоий хизматлар марказлари талабномаси бўйича юборилган тазйиқ ва зўравонликдан жабр кўрган тегишли билим ва кўникмаларга эга бўлган хотин-қизларни ишга қабул қилишни бўш (вакант) иш ўринлари мавжуд бўлгани ҳолда асоссиз равишда рад этган давлат ташкилотларига, давлат улуши эллик фоиз ва ундан юқори бўлган ташкилотларга қонунчиликда белгиланган тартибда жавобгарлик белгиловчи меъёрлар киритилмоқда.
Амалдаги тартибга кўра, ишга жойлаштириш бўйича йўлланма бериш фақат “Аҳоли бандлиги тўғрисида”ги қонун асосида амалга оширилади.
Қайд этилишича, ушбу қонун лойиҳасининг қабул қилиниши аҳолини ишга жойлаштириш бўйича аҳолига кўрсатилаётган хизматлар самарадорлигини оширишга, тазйиқ ва зўравонликдан жабр кўрган тегишли билим ва кўникмаларга эга бўлган хотин-қизларнинг бандлигини таъминлаш орқали ижтимоий ҳимоясини кучайтиришга хизмат қилади.
Шавкат Мирзиёев 3 май куни ижтимоий хизматлар тизимини янада такомиллаштиришга оид таклифлар тақдимоти билан танишган эди. Ўшанда давлат раҳбари ҳар бир аёл учун муносиб турмуш ва меҳнат шароитлари яратиш бўйича қўшимча кўрсатмалар берган.
Изоҳ (0)