Франция пойтахти Парижда бўлиб ўтаётган ёзги Олимпия ўйинларида озарбайжонлик камончи Яйлагул Рамазонова ҳомиладор ҳолатда мамлакат шарафини ҳимоя қилди.
Унинг ҳомиладорликнинг еттинчи ойида мусобақада иштирок этиши ижтимоий тармоқлар ва ОАВ ларида қизғин муҳокамаларга сабаб бўлди.
Ўз таассуротлари билан ўртоқлашар экан, Рамазонова мусобақа давомида яқинлашиб келаётган оналикка унга куч берганини таъкидлади.
“Мақсад кейинги босқичга ўтиб, ғалаба қозониш эди. Асосий мақсадим давлат байроғимизни баланд кўтариб, юртимга медал олиб бериш эди. Лекин бу ердаги рақиблар сараланган спортчилар. Олимпиадада кучсиз рақиблар йўқ. Менинг биринчи рақибим хитойлик спортчи эди, мен 1/16 финалга чиқдим.
Мен трибуналарда мухлисларнинг меҳрини қозондим, бу ажойиб бўлди, мендан ташқари яна бир Мисрлик иштирокчи ҳомиладор эканлигини билдим.
Фарзандим қачондир Олимпиадада қатнашадими? Бу келажакда кўринади. Оиламизда ҳам спортчилар, ҳам санъаткорлар бор. Унинг ўзи танлайди. Асосийси, ўз ватанини севадиган муносиб инсонни тарбиялаш”, дея қўшимча қилди Рамазонова.
Маълумот учун, Яйлагул Рамазонова германиялик рақибига 6:2 ҳисобида мағлуб бўлиб турнирни тарк этди.
Аввалроқ қиличбозлик бўйича мусобақада мисрлик қиличбоз етти ойлик ҳомиласи билан иштирок этаётганини маълум қилган эди.
26 ёшли Нада Ҳафез биринчи баҳсда ғалаба қозонди, аммо бўлажак она 1/8 финал босқичида мағлуб бўлиб турнирни тарк этди.
Изоҳ (0)