Гугурт ишлаб чиқарувчи корхоналарнинг маҳсулотлари сифатсиз экани аниқланди, деб хабар бермоқда Рақобат қўмитаси ахборот хизмати.
Унга кўра, назорат хариди учун “Avion”, “Jeep”, “Фэско”, “Гугурт” ва “Viktory” савдо белгиси остидаги гугурт маҳсулотларидан сотиб олинган намуналарнинг GOST 1820-2001 стандарти талабларига номувофиқлиги аниқланди. Қўмита томонидан ҳолат юзасидан олиб борилган ўрганишларда қуйидагилар аниқланди:
Харид қилинган намуналарда минимал гугурт чўпи сони 11-17 донага камлиги натижасида
- Up-Match МЧЖ (“Jeep”) 150 миллион сўмлик маҳсулот сотилган, истеъмолчилардан эса 44 млн 700 минг сўм ортиқча маблағ олинган;
- Atlas-Invest МЧЖ томонидан 66,5 миллион сўмлик гугурт сотилган бўлиб, истеъмолчилардан 20,5 миллион сўм ортиқча маблағ олинган.
Рақобат қўмитаси томонидан мазкур МЧЖларга бажарилиши мажбурий бўлган кўрсатмалар берилган. Мазкур жамиятлар томонидан кўрсатма талаблари ўз вақтида бажарилиши таъминланди. Сифатсиз гугурт маҳсулотлари савдо расталаридан олинди. Ортиқча олинган маблағларни истеъмолчиларга қайтариш ёки гугуртларни сифатлисига алмаштириш бўйича чора-тадбирлар белгиланди.
Шунингдек, сифатсиз чиққан “Avion”, “Фэско”, “Viktory” савдо белгиси остидаги гугурт маҳсулотлари хорижий корхоналар томонидан ишлаб чиқарилгани аниқланди ҳамда уларга нисбатан ҳам белгиланган тартибда чора кўриш ишлари олиб борилмоқда.
Маълумот ўрнида, GOST 1820-2001 стандарти талаблари бўйича 4 (2/3) форматдаги гугуртларнинг алоҳида қутиларида энг кўп тўлдирилиши 40 дан 60 донагачани ташкил этиши, энг кам тўлдирилиши 37 дан 52 донагача бўлиши шарт.
Ушбу ҳолатлар юзасидан гугурт маҳсулотларининг реализациясида қонун бузилишига йўл қўйган субъектларга нисбатан белгиланган тартибда чора кўриш ишлари олиб борилмоқда.
Изоҳ (0)