Ўзбекистондаги 15 та заправкада сифатсиз бензин сотилгани аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қайд этилишича, АЁҚШларда сотилаётган ёнилғиларнинг баъзилари стандарт талабларга мос эмаслиги оқибатида автомобиль двигателларининг носоз ҳолатга келаётгани ҳақида минглаб шикоятлар келиб тушмоқда. Шунингдек, ушбу мавзу ижтимоий тармоқларда ҳам аҳоли ўртасида кенг муҳокамаларга сабаб бўлмоқда.
Қўмита 2024 йилнинг январь—апрель ойлари давомида “Ўзэнергоинспекция” билан ҳамкорликда мазкур ҳолат юзасидан республиканинг 50 га яқин автомобилларга ёнилғи қуйиш шохобчаларида сотилаётган бензинларнинг сифатини ўрганиш учун назорат харидини ўтказди.
Лаборатория таҳлиллари хулосасига кўра, Аи-92 ва Аи-95 маркали сотилган сифатсиз бензинлар 15 та АЁҚШларга тегишли экани маълум бўлди.
Самарқанд вилоятида 12, Фарғона, Сурхондарё, Наманган вилоятларида эса биттадан хизмат кўрсатувчи шохобчаларда шундай бензин сотилгани аниқланган.
Унинг оқибатида истеъмолчиларга 201 миллион сўмдан ортиқ зарар етказилган.
Қўмитанинг ҳудудий органлари томонидан истеъмолчиларга етказилган зарарни қоплаш мақсадида 15 та хўжалик юритувчи субъектга нисбатан ўрнатилган тартибда иш қўзғатилиб, бажарилиши лозим бўлган кўрсатмалар берилган. Ушбу кўрсатмалар натижасида 2139 нафар истеъмолчининг ҳуқуқлари тикланиб, уларнинг фойдасига тегишли тартибда пул маблағлари қайта ҳисоб-китоб қилиб берилиши таъминланган.
Изоҳ (0)