Ўзбекистонда сотилаётган Афғонистоннинг анорли ичимлиги сифат талабларига жавоб бермаслиги аниқланди

Ўзбекистонда сотилаётган Афғонистоннинг анорли ичимлиги сифат талабларига жавоб бермаслиги аниқланди. Бу ҳақда Техник жиҳатдан тартибга солиш соҳасида назорат инспекцияси “Дарё”га маълум қилди.

Қайд этилишича, инспекция томонидан Ўзбекистонда ишлаб чиқарилаётган ҳамда импорт қилинаётган маҳсулотлар сифати ва хавфсизлиги мунтазам ўрганиб келинмоқда. Жумладан, бозорлар ва савдо расталарида сотилаётган Royal савдо белгиси остидаги анор шарбати маҳсулоти техник жиҳатдан тартибга солиш соҳасидаги меъёрий ҳужжатлар талабига қай даражада мос келиши ўрганилди.

Ўрганиш натижаларига кўра, Royal савдо белгиси остидаги анор шарбати маҳсулоти тамғаланиши (маркировка) бўйича УзТР.490-022:2017 “Озиқ-овқат маҳсулотларини тамғалаш юзасидан унинг хавфсизлиги тўғрисидаги умумий техник регламент”ининг 8, 36, 53 ва 58-бандлари талабларига номувофиқлиги аниқланди.

Аккредитланган синов лабораториясининг хулосасига кўра, Royal савдо белгиси остидаги анор шарбати маҳсулоти таркибида “Азорубин, E 122” моддаси белгиланган меъёрдан ортиқ эканлиги маълум бўлди.

Айтилишича, УзТР.490-022:2017 “Озиқ-овқат маҳсулотларини тамғалаш юзасидан унинг хавфсизлиги тўғрисидаги умумий техник регламент”нинг 36-бандига мувофиқ, таркибида ранг берувчилар (E122 азорубин, E сариқ хинолин, FCF E110 сариқ “қуёш ботиши”, АS E129 қизил мафтункор, 4R E124 понсо ва E102 тартразин) озиқ-овқат маҳсулотлари учун “Таркибида ранг берувчи (ранг берувчилар) мавжуд, улар болаларнинг фаоллигига ва диққатига салбий таъсир кўрсатиши мумкин” деган огоҳлантирувчи ёзув ёзилиши керак.

Юқоридагиларни инобатга олган ҳолда, Ўзбекистоннинг “Техник жиҳатдан тартибга солиш тўғрисида”ги, “Стандартлаштириш тўғрисида”ги, “Метрология тўғрисида”ги, “Истеъмолчиларнинг ҳуқуқларини ҳимоя қилиш тўғрисида” ги қонунлари ва техник жиҳатдан тартибга солиш соҳасидаги норматив ҳужжатлар талабларини бажармаслик қонун бузилишига олиб келиши огоҳлантирилди.