Ijtimoiy tarmoqlarda tog‘ suvsarining bolasi vahshiylarcha urib o‘ldirilgani haqida videolar tarqaldi. Surxondaryo viloyati Ekologiya boshqarmasi matbuot xizmati holatga izoh berdi.
Unga ko‘ra, holat yuzasidan boshqarma tomonidan o‘rganish ishlari olib borilmoqda. Hozirda viloyat Ekologiya boshqarmasi, viloyat Milliy gvardiya boshqarmasi hamda viloyat Ichki ishlar boshqarmasi tomonidan videoda aks etgan joyni va ushbu ishni sodir etgan fuqarolarning shaxsiga aniqlik kiritish ishlari amalga oshirilmoqda.
Mazkur holat bo‘yicha olib borilayotgan o‘rganishlar yakuni bo‘yicha qo‘shimcha axborot beriladi.
Ma’lumot uchun, tog‘ suvsari suvsarlar oilasiga mansub, O‘rta Osiyo, Yevropa va Osiyo bo‘ylab keng tarqalgan yirtqich sutemizuvchi hayvondir. Tog‘ suvsari ko‘pincha o‘rmonlar, tog‘li hududlarda yashaydi. Ularning tana uzunligi 40-50 sm, dumi 25-30 sm atrofida bo‘ladi. Vazni odatda 1,5-2,5 kg ni tashkil qiladi. Uning mo‘ynasi silliq va zich, asosan qo‘ng‘ir va sarg‘ish tusda bo‘ladi, bo‘yin qismidagi oq dog‘lari bilan ajralib turadi.
Tog‘ suvsarlari yirtqich jonivor bo‘lib, kichik sutemizuvchilar, qushlar, hasharotlar va mevalar bilan oziqlanadi. Qish oylarida yemish tanqis bo‘lsa, insonlar tomonidan tashlab ketilgan oziq-ovqat qoldiqlarini ham iste’mol qilishi mumkin.
Izoh (0)