Safety Perception Index тадқиқот манбаси 2023 йил учун эълон қилган ҳисоботида Ўзбекистонни халқаро ташриф буюрувчилар учун энг хавфсиз давлат сифатида кўрсатган. Бу ҳақда мустақил тадқиқот органининг сайтида эълон қилинган ҳужжатда айтилади.
Рейтингда энг хавфсиз мамлакатлар дея мос тартибда Ўзбекистон, Бирлашган Араб Амирликлари, Саудия Арабистони ва Норвегия қайд этилган. Ушбу тўрт мамлакат “яшил” даража билан белгиланган, фуқаролар ҳаёти ва саёҳат қилиши учун хавф даражаси минимал экани айтилган.
Рейтингнинг энг қуйи қисмини Камерун, Габон, Бразилия, Мозамбик, Конго, Гвинея, Серра-Леоне ва Мали каби давлатлар эгаллаган. Рейтинг бу мамлакатларга “тўқ қизил” даража берган ва саёҳат учун энг хавфли ҳудудлар дея белгилаган.
Маълумот ўрнида, Safety Perception Index хавфсизлик даражасини белгилашда асосан бешта факторга эътибор қаратади: озиқ-овқат ва сув, зўравонлик жиноятлари, ноқулай об-ҳаво шароити, ақлий соғломлик ҳамда меҳнат муассасаларидаги хавфсизлик. Ушбу омиллар мамлакатларнинг хавфсизлик рейтинги учун асос бўладиган образни ишлаб чиқишда муҳим асос бўлиб хизмат қилади.
Манбада айтилишича, сўнгги йилларда Марказий Осиёда, хусусан, Ўзбекистонда қонун ва полиция тартиботи кучайган, иқтисодий омиллар ва ҳукумат чоралари туфайли жиноятчилик ва ижтимоий хавфлар пасайган.
Шарқий Европа, Яқин Шарқ ва Ўрта Шарқ минтақаларида эса ҳарбий инқироз, аҳоли ҳаёти учун хавф даражаси ва қуролли зўравонликлар кучайган. Бунинг оқибатида бу минтақа мамлакатларининг индекси ўртача меъёрдан пастга тушган.
Изоҳ (0)