Перуда 16 июль куни йўловчи автобуси 200 метр баландликдан қулаши оқибатида 29 киши ҳалок бўлди. Бу ҳақда CNN нашри хабар берди.
Манбада айтилишича, ҳалокатга учраган автобус Перу пойтахти Лимадан жанубдаги Аякучо шаҳрига кетаётган бўлган. Ҳайдовчи томонидан йўл қўйилган кичик эҳтиётсизлик оқибатида автобус бурилиш жойида йўлдан чиқиб кетиб, жарга қулаган.
Юз берган ҳодиса юзасидан Ички ичлар вазирлиги жиноий иш қўзғатган ва қутқарув гуруҳларини жалб этган. Ҳаракатланиш қийин бўлган тоғли ҳудудда бедарак йўқолганлар изланаётгани билдирилган.
Воқеа оқибатида 13 киши тан жароҳати олган. Уларга биринчи тиббий ёрдам кўрсатилиб, яқин атрофдаги касалхонага олиб кетилган.
Сўнгги бир неча йил ичида Перунинг тоғли йўлларида бир нечта ҳалокатли ҳодисалар кузатилган. Йўлларнинг талабга жавоб бермаслиги, хавфли бурилишларнинг кўплиги ҳалокатларнинг асосий сабаби бўлган.
2021 йил апрель ойида ҳам Перунинг Анкаш департаментида, Лимадан тахминан 180 километр узоқликда автобус ҳалокати юз берган эди. Унда 20 киши ҳалок бўлган ва 14 киши жароҳатланган.
2022 йил февраль ойида эса Перу шимолидаги Патаз провинциясида автобус ҳалокатга учраган. Тахминан 100 метр баландликдан қулаган автобус ичида қолиб кетган 20 киши ҳалок бўлган. 33 киши жароҳат олган.
Изоҳ (0)