Бангладешда ҳукуматнинг янги меҳнат квотасига қарши намойишда 100 дан ортиқ одам жароҳатланди

Бангладешда 15 июль куни юз берган оммавий намойишларда 100 дан ортиқ фуқаро жароҳатланди. Бу ҳақда Al Jazeera нашри хабар берди.

Манбада айтилишича, ҳукуматнинг янги қонуни мамлакатнинг мустақиллик урушида қатнашган ҳарбийлар ва уларнинг фарзандлари, шунингдек, ҳукумат аъзолари фарзандларига иш топишда имтиёз ва муҳим давлат мансабларига киришда преференсиялар беради.

Намойишчилар квоталар тизими ҳукуматпараст гуруҳлар фарзандларига фойда келтиришини айтган. Бундай адолатсиз тизимни бекор қилиш сўралган.

Танқидчиларнинг айтишича, янги тизим бош вазир Шайх Ҳасина ҳукуматини кучайтиришга хизмат қилади. Унинг амалдорлари ҳукумат атрофида янада жипслашишига олиб келади.

Бангладеш олий суди ўтган ҳафтада меҳнат квотаси тўғрисидаги янги қонунни вақтинча тўхтатган эди. Бироқ намойишчилар ўзлари қарши бўлган схеманинг қисмлари бутунлай бекор қилинмагунча митингларини давом эттиришга ваъда берган.

Полиция ва гувоҳларнинг айтишича, квотага қарши юзлаб намойишчилар ва ҳукмрон Авами Лигаси партиясини қўллаб-қувватлаган талабалар душанба куни Дакка университети кампусида тўқнашган. Намойишчилар тош ва таёқлар билан бир-бирларига шикаст етказган.

Ташқи ишлар вазири Ҳасан Маҳмуднинг айтишича, айрим сиёсий гуруҳлар квотага қарши ҳаракатлардан мамлакатда тартибсизликлар уюштириш учун фойдаланмоқда. Расмийлар талабаларни ҳиссиётларга эрк бермасликка, ҳукуматга қарши ҳаракат содир этмасликка чақирган.