Америкалик бизнесмен Илон Маск АҚШ президентлигига номзод Дональд Трампнинг сайловолди кампаниясига ойига 45 миллион доллар ажратишни режалаштирди. Бу ҳақда манбаларга таяниб, Wall Street Journal хабар берди.
Пулни Аmerica PAC деб номланган сиёсий фаоллик бўйича қўмита олади. Бу ташкилот Трампнинг сайловолди штаби билан бевосита боғлиқ эмас. Ҳомийлар орасида ҳарбий тузилмалар учун дастурий таъминот ишлаб чиқувчи Palantir Technologies ҳаммуассиси Жо Лонсдейл, АҚШнинг Канададаги собиқ элчиси Келли Крафт ҳам бор.
Аmerica PAC иккиланаётган штатларда сайловчиларни рўйхатга олиш ва муддатидан олдин овоз беришга ишонтириш билан шуғулланади. Ташкилот демократлар сайловчилар базасини ошириш бўйича кучли кампаниялар ўтказганини инобатга олган ва бунга қарши туришга ҳаракат қилмоқда. Аmerica PAC сўнгги бир неча ҳафта ичида Трамп кампаниясига тахминан 15 миллион доллар сарфлади.
Аввалроқ Маск на Байден, на Трампнинг сайловолди кампанияларини молиялаштиришни кўриб чиқишини айтганди. Май ойида Wall Street Journal нашри Маск ва Трамп илгари бир-бирини очиқ танқид қилган бўлса-да, сўнгги пайтларда улар бир неча бор телефонда суҳбатлашгани ҳақида ёзганди. Сиёсатчига қилинган муваффақиятсиз суиқасддан сўнг Маск уни қўллаб-қувватлашини билдирган ва Теодор Рузвельт давридан бери АҚШда “бундай зўр номзод” бўлмаганини айтган.
Изоҳ (0)