Ўзбекистонда автотранспорт воситалари савдоси июнь ойида 13,3 фоизга пасайди

Ўзбекистонда июнь ойида автотранспорт воситаларининг умумий савдолари 13,6 фоизга пасайди. Фаоллик йиллик ҳисобда 1,4 баравар қисқарди. Бу ҳақда Иқтисодий тадқиқотлар ва ислоҳотлар маркази таҳлилида сўз боради.

Июнь ойидаги тадқиқ натижаларига кўра, республика бўйича автотранспорт воситаларининг умумий савдолари 13,6 фоизга камайган ҳамда қарийб 87 минг донани ташкил этган. Йиллик ҳисобда бозор фаоллиги 1,4 бараварга қисқарган.

Шу билан бирга, янги енгил автомобилларнинг бирламчи бозори иккиламчи бозорга қараганда анча барқарор динамикани намойиш этмоқда. Электр автомобиллар сегменти эса алоҳида қизиқиш уйғотмоқда, бу йўналишда бирламчи бозорда сотувларнинг 28 фоизга пасайганига қарамасдан, иккиламчи бозор 2,4 фоизга ўсишни намоён этган.

Ушбу динамика қисман мавсумий омилларга боғлиқ бўлиши мумкин, чунки ёзги мавсум анъанавий равишда ишбилармонлик фаоллигининг пастлиги билан характерланади, дейилади таҳлилда.

Енгил автомобиллар сегментидаги вазият

Олдинги ойга нисбатан 14 фоизга ўсиш кузатилган май ойида енгил автомобиллар савдолари йил бошидаги бир оз пасайишдан сўнг тикланиш белгиларини кўрсатаётган эди. Бироқ июнь ойида сотувлар ҳажми яна 13,3 фоизга, 77,6 минг донагача пасайиши юз берган.

Йил ҳисобида енгил автомобиллар бозори ҳам қисқарди, бу йўналишда сотувлар бир йилда 1,4 бараварга пасайган.

Ҳудудий кесимда енгил автомобиллар савдосининг динамикаси шуни кўрсатмоқдаки, июнь ойида энг катта пасайиш Сурхондарё ва Андижон вилоятларида, шунингдек, Қорақалпоғистон Республикасида — ўртача 22 фоизга — қайд этилган.

Шу билан бирга, баъзи ҳудудларда сотувлар ошгани кузатилган. Хусусан, 6 ойда Хоразм ва Навоий вилоятларида ўтган йилнинг муқобил даврига солиштирганда ўртача 7 фоизлик ижобий динамика кузатилмоқда.

Бирламчи автобозордаги вазият

Июнь ойида енгил автомобилларнинг бирламчи бозорида савдолар ўтган ойга нисбатан 9 фоизга камайган ҳамда 26 минг донадан ошган. Йиллик ҳисобда фаолликнинг кичикроқ — 5,3 фоизга пасайиши қайд этилмоқда.

Шундай қилиб, янги енгил автомобилларнинг бирламчи бозори иккиламчи бозорга нисбатан анча барқарор динамикани намойиш этмоқда. Июнь ойида маҳаллий ишлаб чиқарилган янги автомобиллар сотувининг қисқариш тенденцияси давом этган. Хусусан, бундай автомобиллар сотувлари май ойига нисбатан қарийб 10 фоизга пасайган. Йиллик ҳисобда ушбу сегментда фаолликнинг бир оз — атиги 0,8 фоизга пасайиши кузатилмоқда.

Енгил хорижий автомобиллар сегменти турғунлиги давом этмоқда

Ўзбекистон бозорида хорижий енгил автомобиллар бозори турғунлик белгиларини намоён этмоқда. Июнь ойида ушбу сегментдаги сотувлар атиги 0,4 фоизга ўсган ва 2,4 минг дона атрофидани ташкил этган. Фаолликнинг нисбатан кичик ўсиши йиллик ҳисобда сотувларнинг сезиларли пасайишини қопламайди. Бу кўрсаткич ўтган йилга нисбатан қарийб 34 фоизни ташкил этган.

Енгил автомобиллар иккиламчи бозори

Енгил автомобиллар иккиламчи бозоридаги вазият сотувлар динамикасининг пасайиши, йиллик сотувлар ҳажмининг пасайиш тенденциясини сақлаб қолаётгани билан тавсифланади.

Хусусан, июнь ойида енгил автомобилларнинг иккиламчи бозоридаги фаоллик ўтган ойга нисбатан 15,3 фоизга пасайган, ўшанда пасайиш 3,4 фоизни ташкил этган эди. Ҳисобот даврида ушбу сегментда 51,5 минг атрофида автомобиль сотилган. Умуман олганда, сотувлар йиллик ҳисобда 1,6 баравардан кўпга қисқарди.

Электромобильлар бозоридаги вазият

Июнда енгил электромобиллар сегменти сотувларнинг пасайишини намоён этди. Сотувлар ҳажми 3 минг донага етган, бу эса май ойидагига нисбатан 800 дан ортиққа камдир. Шунга қарамасдан, электромобиллар савдоси ўтган йилнинг июнь ойи даражасига нисбатан 1,3 бараварга ошган.

Агар Ўзбекистонда электромобиллар бирламчи бозорида сотувлар бир ой ичида сезиларли даражада — 28 фоизга қисқарган бўлса, иккиламчи бозорда бунинг акс тенденцияси кузатилмоқда. Бу сегментда март ойидан буён фаолликнинг ўсиши қайд этилмоқда. Июнь ойида бу кўрсаткич 2,4 фоизни ташкил этган.

Аввалроқ Ўзбекистонда енгил автомобиллар савдоси уч ой ичида биринчи марта ўсгани, UzAutoMotors Lacetti Gentra ишлаб чиқаришни тўхтатиши ҳақида хабар берган эди. 2024 йилнинг 8 май куни эса UzAutoMotors 15 дақиқа ичида Lacetti’га 4,4 мингта шартнома тузган. Марказий банкка кўра  мамлакатда автомобиллар асл нархидан қиммат сотилишда давом этмоқда.