Ўзбекистон 2023 йилнинг сўнггида Қозоғистонга сўнгги 18 йилдаги энг йирик сармоя киритган. Бу ҳақда “Закон.кз” манбаси хабар берди.
Манбада айтилишича, Ўзбекистондан Қозоғистонга киритилган тўғридан тўғри инвестициялар ҳажми 2023 йил охирида рекорд даражадаги 22,2 миллион долларга етган. Бу 2005 йил якунидан бери қайд этилган энг катта статистика ҳисобланади.
Ўтган йили Қозоғистон ва Ўзбекистон бир қанча муҳим лойиҳаларни амалга оширган. Жумладан, Қўстанай вилоятида Chevrolet Onix автомобилларини ишлаб чиқариш йўлга қўйилган. Олмаота вилоятида металл прокат ишлаб чиқарувчи завод қурилган. Чимкентда стерил дори шакллари ва гигиена воситалари ишлаб чиқариш платформаси ташкил этилган.
Ўзбекистондан инвестиция таклифлари ошиши Қозоғистондаги бизнес муҳити билан боғлиқ экани хабар қилинган. Қўшни мамлакатда бизнес юритиш, инвесторлар ҳуқуқларини самарали ҳимоя қилиш ва инвестицияларни рағбатлантириш учун ниҳоятда қулай шарт-шароитларни яратилгани таъкидланган.
Тошкент ва Остона ҳукуматлари ўзаро ҳамкорликни янги жабҳага кўтариш бўйича умумий дастурга эга. Мамлакатлар яқин келажакда ўзаро товар айирбошлаш ҳажмини 10 миллиард долларга етказиш ва ишбилармонлик алоқаларини кенгайтиришга келишиб олишган.
Аввалроқ Ўзбекистон Қозоғистонда рўйхатдан ўтган компаниялар сони бўйича Хитойни ортда қолдириб, учинчи йирик хорижий инвесторга айлангани хабар қилинган эди. Ушбу статистика ҳам Қозоғистон учун Ўзбекистон потенциал ҳамкор эканини кўрсатади.
“Мингдан ортиқ қўшма корхонамиз бор, бу жуда яхши. Ўз маҳсулотларини Евроосиё иқтисодий иттифоқи мамлакатларига экспорт қилишга интилаётган ўзбекистонлик тадбиркорлар кўпинча Қозоғистонни қулай база сифатида танлайди. Айни пайтда қозоғистонлик тадбиркорлар Ўзбекистонга фаол сармоя киритмоқда. Буни чуқурроқ ўргана бошласак, бу компанияларнинг кўпчилиги Қозоғистон капитали ва инвестицияларига асослангани маълум бўлади, бу эса иш ўринлари яратилишига ва маҳаллий ваколатларнинг ривожланишига олиб келди. Бу ҳар икки давлат учун жуда муҳим ва фойдалидир ва биз ўзаро манфаатли ҳамкорликни давом эттиришимиз керак, деб ҳисоблайман”, — деган ҳолатга муносабат билдирган Қозоғистон ҳукуматининг Ўзбекистондаги элчиси Бейбут Атамқулов
Изоҳ (0)