Ижтимоий тармоқларда Бухорода вояга етмаганларнинг тўйи бўлгани ҳақида хабарлар тарқалган эди. “Замон” дастурида ҳолат юзасидан қўшимча маълумот берилди.
2008 йилда Шофиркон туманида туғилган А.А. (ўғил бола) 2007 йилда Қоракўл туманида туғилган Р.Н. (қиз бола)нинг ўртасида иккала вояга етмаганнинг оилалари ўзаро келишуви асосида 29 июнь куни Бухоро шаҳрида никоҳ тўйи бўлиб ўтган.
Маълум қилинишича, шофирконлик йигит тайёрлов курсларида қатнашиш мақсадида Қоракўл туманига келган ва ижара уйида яшаб келган. Унинг ота-онаси тадбиркорлик мақсадида Тошкент шаҳрида яшаган.
“Йигит ижарада ёлғиз туради. Бу вазиятда фарзанднинг ихтиёри ўзида бўлади. Ота-онаси Тошкентда. Қизимиз ҳам тўлиқсиз оилада вояга етган экан. Ота-оналари ажрашган”, — дейди маҳалла фаоли.
Улар ҳали оилага тайёр эмаслиги, оиласини қонунийлаштиришга эса асос йўқлиги таъкидланган. Ҳолат юзасидан Қоракўл туман ИИБ ҳузуридаги тергов гуруҳи томонидан терговга қадар текширув ҳаракатлари олиб борилди.
2 июль куни вояга етмаганларнинг ота-оналари Н.С. ва Н.Қ.ни МЖтКнинг 47-3 моддаси (никоҳ ёши тўғрисидаги қонунчиликни ёки никоҳ тузиш тартибини бузиш) билан маъмурий жавобгарликка тортиш юзасидан ҳужжатлар судга юборилди.
Ҳолат болалар омбудсмани томонидан алоҳида кузатувга олинган.
Изоҳ (0)