Фарғона вилояти ҳокими Хайрулло Бозоров Хитойнинг Shiyan Zhenke Industrial Technology компанияси раҳбари Сяо Сянсянни қабул қилди. Бу ҳақда вилоят ҳокимлиги матбуот хизмати хабар берди.
Учрашувда Хитой компанияси томонидан Фарғонада икки босқичда амалга ошириш режалаштирилаётган махсус транспорт воситалари ишлаб чиқариш инвестицион лойиҳаси муҳокама қилинган.
Икки босқичли инвестицион лойиҳанинг дастлабки босқичида 20 миллион доллар инвестиция ҳисобига Фарғонада йиғиш, пайвандлаш ва бўяш линиялари ташкил этилиб, йилига 500 та махсус транспорт воситалари ишлаб чиқарилади. Иккинчи босқичда қўшимча 20 миллион доллар инвестиция йўналтирилиб, ишлаб чиқариш қуввати ойига 100 тага етказилади. Лойиҳани тўла амалга ошириш муддати 3 йилни ташкил этиши маълум қилинган. Ишлаб чиқариладиган транспортлар бозорга янги маҳаллий бренд остида етказиб берилади.
Хитой томони лойиҳани жойлаштириш бўйича вилоятдаги кичик саноат зоналари ҳамда Қўқон ЭИЗ ҳудудидаги мавжуд имкониятларни ўрганиб чиққач, музокараларни давом эттиришга келишиб олинган.
Аввалроқ Хитой компанияси Фарғонада йирик автомобилсозлик мажмуасини барпо этиши, Ўзбекистонда биринчи чиқиндиларни ёқиш заводини қуриш режалаштирилаётгани тўғрисида хабар берилганди.
Изоҳ (0)