Ироқ шимолидаги Мосул шаҳрида маҳаллий масжид деворлари орасидан бешта йирик бомба топилди. Бу ҳақда Al Jazeera нашри хабар берди.
Манбада келтирилишича, Ал-Нури масжидида таъмирлаш пайтида бомбалар аниқланган. Ироқ расмийлари ЮНЕСКО дан масжид ҳудудидаги барча реконструкция ишларини тўхтатишни ва бомбалар зарарсизлантирилгунга қадар бутун мажмуани эвакуация қилишни сўраган.
Мосулнинг тарихий ёдгорлиги ҳисобланган Ал-Нури масжидидан топилган бешта бомба ИШИД томонидан ўрнатилгани тахмин қилинган. Чунки Мосул ва Эрбил шаҳарларини ўз ичига олган Ироқ шимолий ҳудудлари анча йиллар олдин ИШИД томонидан назорат қилинар эди.
Ал-Нури масжиди 12-асрга тегишли обида ҳисобланади. Иншоот 2017 йилда ИШИД кучлари томонидан вайрон қилинган ва ибодатлар учун тақиқлаб қўйилган. Ироқ шимолидаги ИШИД енгилгач эса масжид назорати Бағдодга қайтди. 2020 йилда БМТнинг ЮНЕСКО агентлиги масжидни маданий мерос объектлари рўйхатига киритиб, таъмирлаш ишларини бошлаган.
Расмийларга кўра, бомбалар масжид намозхонасининг жанубий деворида топилган. Бомбалар сезгир электрон жиҳозга бириктирилган бўлиб, ниҳоятда вайронкор бўлган.
“Ушбу портловчи қурилмалар деворнинг махсус қайта қурилган қисмида яширинган”, — дейилади UNESCOнинг шанба куни эълон қилган ҳисоботида.
Ҳозирда бомбалардан бири тўлиқ зарарсизлантирилган ва ҳудуддан олиб кетилган. Бири-бирига уланган тўртта бомба эса зарарсизлантирилаётгани, бу борада махсус гуруҳ ишлаётгани билдирилган.
Маъллумот ўрнида, ИШИД етакчиси Абу Бакр ал-Бағдодий бундан ўн йил аввал, 2014 йил 29 июнь куни масжиддан туриб “халифалик давлати” тузилганлигини эълон қилган эди. 2017 йилда эса террорчилар ҳаракати оқибатида масжиднинг бир қисми портлати юборилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)