Нигерия шимоли-шарқида 29 июнь куни уюштирилган портлашлар оқибатида камида 18 киши ҳалок бўлди. Бу ҳақда CNN нашри хабар берди.
Ҳолат мамлакат шимоли-шарқидаги Борно штатида юз берган. Худкуш террорчилар камида учта ҳудудда оломон ичига кириб, ўзини портлатган.
Терактлар оқибатида 18 нафар фуқаро вафот этгани расман тасдиқланган. Штат фавқулодда вазиятлар вазирлиги жароҳатланганлар сони 48 нафар эканини маълум қилган.
Манбага кўра, биринчи портлаш шанба куни тахминан соат 15:00 да тўй маросими пайтида содир этилган. Иккинчи портлаш Гвоза умумий давлат касалхонасида, учинчи ҳужум эса штат марказидаги дафн маросими пайтида юз берган.
Борно штати давлат фавқулодда вазиятлар агентлиги бош директори Баркиндо Муҳаммад Саиду Гвоза шаҳридаги портлаш жойига ташриф буюрган. У қурбонлар шахсини тезда аниқлашни буюрган ва ҳалок бўлганлар оилаларига ҳамдардлик изҳор қилган.
Расмийларга кўра, ҳалок бўлганлар орасида болалар, катта ёшлилар ҳамда ҳомиладорлар бор. Фуқаролар қорин бўшлиғи ёрилиши, бош суягининг синиши ва оёқ-қўлларининг эзилишидан вафот этган.
Ҳужум учун жавобгарликни ҳозирча ҳеч бир гуруҳ зиммасига олмаган. Штат полицияси ҳам ҳужум юзасидан саволларни жавобсиз қолдирган.
Ҳукуматнинг айрим олий расмийлари ҳужумларда “Боко Ҳарам” ва “Ғарбий Африка Исломий Давлати” (ISWAP) каби ташкилотларни айблаган. Ушбу тузилмалар Борно штати ҳудудидаги энг йирик диний-эктремистик гуруҳлар ҳисобланади.
Изоҳ (0)