Токио университети олимлари тажриба тариқасида инсон терисининг тирик ҳужайраларидан робот учун қоплама яратдилар. Уларнинг тадқиқот натижалари Cell Reports Physical Science журналида чоп этилди.
Кўп уринишлардан сўнг мутахассислар робот юзасига тирик терини қоплашга муваффақ бўлишган. Олимлар робот юзини таркибида коллаген бўлган гел билан қоплаган, сўнгра ишлаб чиқилган терини қўллашган.
Мутахассислар нафақат терини мураккаб тузилмаларга қандай бириктиришни ўрганишган, балки ҳаракатлар пайтида терининг йиртилмаслигини ва парчаланмаслигини ҳам таъминлаган.
Бироқ, олимлар томонидан ишлаб чиқилган терини инсон терисининг тўлиқ аналоги деб атаб бўлмайди. Унда сенсор функциялар ва озиқ моддаларининг келишини таъминловчи қон томирлари йўқ. Бундай тери ҳавода узоқ вақт давомида ўз хусусиятларини сақлаб қололмайди.
Биринчи вариант оддий бўлиб чиққан, аммо мутахассислар таъкидлаганидек, бу осонлик билан шикастланмайдиган ўз-ўзидан тикланадиган терига эга реал, ҳаракатланувчи гуманоидларни яратишга йўл очади, — дейилади хабарда.
Мазкур технология кенг миқёсда қўлланилишидан олдин яна кўп йиллик тадқиқотларни талаб қилади. Шу билан бирга, олимлар мазкур ихтиро нафақат биогибрид робототехника ривожига, балки терининг қаришини ўрганиш, косметикани ривожлантириш ва пластик жарроҳликни такомиллаштиришга ҳам ҳисса қўшишига ишонч билдирган.
Изоҳ (0)