Immunitetning asosiy vazifasi organizmdagi ichki o‘zgarishlarni aniqlash va ularni bartaraf etishdir. Normal immunitet soat kabi ishlaydi va patogenlardan himoya vazifasini bajaradi. Agar immunitet zaiflashsa, uning virus va bakteriyalarga qarshi himoya qilish funksiyasi kamayadi va salomatlik bilan bog‘liq muammolar rivojlana boshlaydi. Quyida qanday belgilar immunitet sust ishlayotganidan darak berishi va unga qanday yordam berish kerakligi haqida suhbat quramiz.
Zaif immunitet belgilari
Immun tizimi yaxshi ishlamayotganining eng birinchi belgisi bu tez charchash va doimiy holsizlikdir. Agar 8 soat uyqudan keyin ham charchoqni his qilsangiz, bu jiddiy signal. Ehtimol, sizning immun tizimingiz o‘z vazifasini yaxshi bajara olmayapti va tiklanib olish uchun tanadagi bor energiyani o‘ziga tortib olyapti.
Zaif immunitetning ikkinchi belgisi tana haroratining biroz ko‘tarilishidir. Agar bir necha kun davomida sababsiz 37° C yoki undan yuqori haroratda yursangiz, bunday holat tanada autoimmun kasalliklar rivojlana boshlaganidan darak berishi mumkin. Bunda imkon qadar tezroq shifokor bilan maslahatlashish lozim.
Tanada qichishish, toshmalar va turli yallig‘lanishlar paydo bo‘lishi ham immunitet susaygandan bo‘lishi mumkin, chunki organizmda bo‘layotgan jarayonlarning barchasi tashqi ko‘rinishimizda aks etadi.
Salomatlik zaiflashganining yana bir belgisi — doimiy bosh og‘rig‘i. Albatta, bosh og‘rig‘ining turfa sabablari bor, ammo immun tizimi yaxshi ishlamaganda miyadagi qon tomirlariga autoimmun hujayralar hujum qiladi va boshga ta’sir qilib, og‘riq yuzaga keladi.
Bir necha hafta davom etadigan qabziyat yoki diareya ham pasaygan immunitet belgilaridan biridir. Biror taom yoqmagan bo‘lsa, oshqozondagi muammolar bir necha kundan yo‘q bo‘ladi. Immunitet pasayganda esa diareya va qabziyat oylab davom etadi.
Qo‘llarning uvushib qolishi va tanada qon yaxshi aylanmasligi ham sust immunitet belgisidir. Uzoq vaqt noqulay holatda qolgandan qo‘llarning uvushib qolishi bundan mustasno. Zaif immunitetda uvushish holatlari tez-tez takrorlanib turadi.
Ko‘zlar yoki yuz terisining sarg‘ayishi shifokor ko‘rigidan o‘tishni talab qiladigan jiddiy alomatdir. Sariqlik jigar kasalliklarining rivojlanishi hamda immunitetdagi buzilishlar alomatidir. Masalan, autoimmun gepatit kasalligida immun tizimi jigardagi sog‘lom hujayralarga hujum qiladi.
Immun tizimining susayishi ko‘zlarning qizarishi, qichishi bilan ham namoyon bo‘lishi mumkin. Shuningdek, tez-tez shamollash, bir yilda ikki va undan ko‘p marta antibiotik kursi bilan davolanish immunitet zaiflashganidan dalolat beradi.
Immunitet zaiflashganda qanday chora ko‘rish kerak?
Immunitetni tiklash uchun shifokorga murojaat etish va mutaxassis tomonidan tuzilgan batafsil davolash rejasiga amal qilish lozim. Boshqa kasalliklar aniqlanganda umumiy davolash shifokori — terapevt sizni tor mutaxassislarga yuboradi. Shifokorlarning umumiy tavsiyalarini qo‘llash, zararli ovqatlar va spirtli ichimliklarni iste’mol qilmaslik, sport bilan shug‘ullanish ham immunitetni tiklashga yordam beradi.
Izoh (0)