АҚШ савдо вакили Кетрин Тай 11 июнь куни Ўзбекистонга ташриф буюради. Бу ҳақда Савдо вакилининг офиси маълум қилди.
Қайд этилишича, Кетрин Тай Ўзбекистон президенти Шавкат Мирзиёев, президент ёрдамчиси Саида Мирзиёева билан учрашади. Шунингдек, АҚШ савдо вакили Ўзбекистон бош вазири ўринбосари Жамшид Хўжаев, инвестициялар, саноат ва савдо вазири Лазиз Қудратов, бандлик ва қашшоқликни қисқартириш вазири Беҳзод Мусаев билан учрашув ўтказади.
Элчи Тай Халқаро меҳнат ташкилоти (ХМТ) томонидан тайёрланган Ўзбекистон форуми аъзолари ва меҳнат кузатувчилари билан ҳам учрашади.
12 июнь Кетрин Тай Самарқанд шаҳрида бўриб, Самарқанд вилояти ҳокими Эркин Турдимов билан учрашув ўтказади. У маданий ёдгорликлар ва йирик тарихий обидаларга ҳам ташриф буюриши режалаштирилган.
Шунингдек, у 13 июнь куни ўтказиладиган Ўзбекистон, Қозоғистон, Қирғизистон, Тожикистон ва Туркманистон расмийлари иштирокида “АҚШ-Марказий Осиё” савдо ва сармоявий ҳадли битими кенгаши йиғилишига раислик қилади.
Аввалроқ Ўзбекистоннинг ЖСТга аъзо бўлиши юзасидан ишчи гуруҳнинг Женевада бўлиб ўтган саккизинчи йиғилишида мамлакатнинг ушбу ташкилотга қўшилиш учун зарур ислоҳотларни амалга ошириш борасидаги саъй-ҳаракатлари юқори баҳоланган эди.
Изоҳ (0)