Дания пойтахти Копенгагенда 7 июнь куни мамлакат бош вазири Метте Фредериксенга ҳужум уюштирилган. Бу ҳақда Дания ҳукумати манбаларига таяниб, CNN нашри хабар берди.
Манбада айтилишича, Копенгаген марказий майдонида номаълум эркак бош вазирга ҳужум қилишга уринган. Қўриқлаш хизмати томонидан ҳужумчи тўхтатилган.
“Жума куни кечқурун Копенгагендаги Култорвет жамоат майдонида Бош вазир Метте Фредериксенни номаълум эркак уриб юборди. Эркак кейинчалик ҳибсга олинган”, — дейилади бош вазир идораси хабарида.
Расмий хабарда Фредериксен “воқеадан ниҳоятда ҳайратда қолгани” айтилган ва бошқа изоҳ берилмаган. Ҳужумда бош вазир жабрланган ёки йўқми борасида ҳам маълумот эълон қилинмаган.
Дания атроф-муҳитни муҳофаза қилиш вазири Магнус Ҳюниске ҳужумдан кейин миллий бирликка чақириб, “сиёсий келишмовчиликлар, сайлов кампаниялари” дан қатъи назар, ҳар бир даниялик бошқаси учун ғамхўрлик қилишга масъул эканини айтган.
“Бизнинг гўзал, хавфсиз ва эркин мамлакатимизда бундай нарса содир бўлмаслиги керак. Бу хунук ва қабул қилиб бўлмас воқеа. Келинг, Дания анча яхши эканини кўрсатайлик”, — деган Магнус Ҳюниске
Ҳужум ортидан биринчи бўлиб Латвия бош вазири Эвика Силина муносабат йўллаган. Ҳамкасби аҳволидан ташвишда эканини маълум қилган.
“Менинг ҳамкасбим ва дўстим, Дания Бош вазири Метте Фредериксенга қилинган даҳшатли ҳужумдан қаттиқ ҳайратда қолдим. Барча яхши ниятларим сиз ва яқинларингиз билан. Тезроқ соғайиб кетишингизни тилайман”, — деган Эвика Силина.
Европа Комиссияси президенти Урсула фон дер Леен ҳужумни қоралаб, уни “Европада биз ишонадиган ва курашаётган ҳамма нарсага зид келадиган жирканч ҳаракат” деб атаган. У бош вазирга куч ва жасорат тилаган.
Маълумот ўрнида, Даниянинг марказий сўл Социалистик-демократик партияси раҳбари Метте Фредериксен 2019 йилдан бери бош вазир лавозимида ишлаб келмоқда. У Европа Иттифоқи ғоясини кенг тарғиб қилиш ҳамда миллий қадриятларни чуқур ҳимоя қилиш борасидаги дастури билан танилган.
Бундан бир ой муқаддам Словакия Бош вазири Роберт Фикога ҳам ҳужум уюштирилган эди. Қуролланган эркак Братиславада бош вазирга ўқ узиб, жароҳат етказган. Ҳозирда вазир нисбатан барқарор кузатув остида экани айтилган. Европа расмийлари Фикога ҳужум сўнгги 20 йилда Европа сиёсий етакчисига уюштирилган биринчи ҳужум эканини маълум қилган эди.
Изоҳ (0)