АПЛда келгуси мавсумда ҳам VAR тизимидан фойдаланилади

Премер-лиганинг камида 19 жамоаси кейинги мавсумда VAR видео ёрдамчиси ишлаши кераклигини ёқлаб овоз берди.

Қарор қабул қилиниши учун 20 клубнинг 14 таси овоз бериши керак эди. Ушбу масаланинг кун тартибига чиқишига “Вулверҳэмптон” клубининг АПЛ учрашувида VAR тизими ишлашига қаршилик қилгани сабаб бўлди.

Аммо 6 июнь, пайшанба куни бўлиб ўтган йиғилиш чоғида юқори дивизиондаги 20 клуб VAR тизими амалда бўлиши учун 6 асосий йўналишга алоҳида эътибор қаратиш кераклигини таъкидлади.

Энг асосий эътибор технологиянинг сифатини кўтариб, ўйиндаги тўхталишлар вақтини кескин камайтирилиши кераклиги таъкидланди.

Премьер Лига баёнотида шундай дейилган: “Премьер Лига клублари бугун VAR тизимидан фойдаланишни давом эттириш тарафдори бўлишди.

VAR аниқроқ қарор қабул қилиш имконини бериш, жамоалар ва мухлисларни ўйлаган ҳолда тизим сифатини яхшилаш ишлари олиб борилади”.

Маълумот учун, VAR технологияси жарима майдони ичидаги қўполлик, қизил карточка ҳамда гол урилиши жараёнида қоида бузилиши ҳолатини текшириш учунгина ишлатилади.